13.03.2026 | 09:39
Ցիկլոնի ներթափանցմամբ պայմանավորված, առաջիկա օրերին, առանձին շրջաններում սպասվում է ձյուն, բուք, մերկասառույց
Ինչպես է 1 տոննա կոկաինը հասել Հայաստան․ ՀՀ-ի և Իտալիայի իրավապահների հաղորդագրությունների հետքերով․ ՏԵՍԱՆՅՈՒԹ
Հասարակություն
17.05.2023 | 14:32
Հայաստանում գործող և մրգերի ներմուծմամբ զբաղվող ընկերություններից մեկը Հայաստան է ներմուծել շուրջ 1 տոննա «Կոկաին»․ այս մասին այսօր հաղորդեց ԱԱԾ-ն։ Սև շուկայում շուրջ 250 մլն եվրո արժեքով արգելված բեռը տեղափոխվել է ԱԱԾ։ Թմրամիջոցը Հայաստան է ներմուծվել Էկվադորում գտնվող ընկերությունից պատվիրված ապրանքատեսակի հետ տարանցիկ երկրների՝ Պանամայի Հանրապետության, Իտալիայի Հանրապետության և Վրաստանի տարածքով։
ԱԱԾ-ն հայտնում է, որ քրեական վարույթով նշանակվել է դատանյութագիտական փորձաքննություն, կատարվել են հարցաքննություններ, տեղեկատվության պահանջ է ուղարկվել իրավասու մարմիններ, հետաքննության մարմնին տրվել է օպերատիվ-հետախուզական միջոցառումներ ձեռնարկելու վերաբերյալ հանձնարարություն:
Այս հաղորդագրությունը ուշագրավ է ոչ միայն առգրավված թմրանյութի խոշոր խմբաքանակով, այլև նրանով, որ հաջորդեց երեկ եվրոպական մամուլում տարածված նմանատիպ մեկ այլ հաղորդագրության։
Reuters-ը՝ հղում անելով տեղի ոստիկանությանը, հայտնել էր, որ Իտալիայի Ջոյա Տաուրո քաղաքի նավահանգստում 2,7 տոննա ընդհանուր քաշով կոկաին է առգրավվել, որը նախատեսվում էր Վրաստանի Բաթումի նավահանգստով ուղարկել Հայաստան։ Ըստ աղբյուրի-ի՝ թմրամիջոցը պահված է եղել Էկվադորից ուղարկված բանանների արկղերում։ Առգրավված բեռի արժեքը սև շուկայում ավելի քան 800 միլիոն եվրո է։ Բեռը շարժվել է Էկվադորի Գուայաքիլ նավահանգստից, իսկ վերջնական նպատակակետը եղել է Հայաստանը՝ Վրաստանի Բաթումի նավահանգստով տարանցմամբ։
Ստացվում է՝ մրգերի ներմուծմամբ զբաղվող ընկերությանը հաջողվել է կոկաինի շուրջ 1 տոննա խմբաքանակ Հայաստան հասցնել, իսկ 2,7 տոննան առգրավվել է իտալացի իրավապահների կողմից։
Հայաստանյան ո՞ր ընկերության մասին է խոսքը և ո՞ր տրանսպորտային ընկերությունն է իրականացրել ծովային փոխադրումը՝ դեռ պարզ չէ․ ՀՀ իրավապահ մարմիններն այս հարցերի պատասխանները դեռևս չեն բացահայտում։
Մանրամասները՝ տեսանյութում։
Արփի Հակոբյան
