Իրանի նախագահը Թեհրանի և Մոսկվայի համագործակցության մեջ «մեծ և նշանակալի քայլ» է անվանել Ռեշտ-Աստարա երկաթուղու կառուցման մասին համաձայնագիրը

Ռուսաստանը և Իրանը համագործակցության համաձայնագիր են ստորագրել ապրանքների և ծառայությունների նախագծման, կառուցման և մատակարարման ֆինանսավորման մասին՝ Իրանում Ռեշտ-Աստարա երկաթուղու կառուցման համար, հայտնում է Ինտերֆաքսը։

Ավելի վաղ հաղորդել էինք, որ ՌԴ նախագահ Վլադիմիր Պուտինը Իրանի նախագահ Իբրահիմ Ռաիսիի հետ միասին տեսակապի միջոցով մասնակցել է արարողությանը։

Ճանապարհը կդառնա «Հյուսիս-Հարավ» միջազգային տրանսպորտային միջանցքի մի մասը։ Դրա ստեղծումը նախաձեռնվել է Ռուսաստանի և Կասպիական տարածաշրջանի երկրների միջև ռազմավարական գործընկերության իրականացման, ինչպես նաև Հյուսիսային և Արևմտյան Եվրոպայի միջև տարանցիկ հաղորդակցություն կազմակերպելու համար Կովկասի, Պարսից ծոցի և Հարավային Ասիայի երկրների հետ։

Իրանի նախագահն այս համաձայնագիրն անվանել է «մեծ և նշանակալի քայլ» Թեհրանի և Մոսկվայի համագործակցության մեջ։ Նա նշել է, որ այս միջանցքը կաշխատի ի շահ տարածաշրջանի բոլոր երկրների. Ռեշտ-Աստարա երկաթուղու շինարարության ավարտից հետո գործելու են երեք ճյուղեր, որոնցով հնարավոր կլինի տեղափոխել ապրանքներ։

Ռաիսին նաև ասել է, որ ենթակառուցվածքների ընդլայնման հետ կապված անհրաժեշտ է «մեծացնել կարողությունները նավահանգիստներում»։ Նա հիշեցրել է, որ արդեն կան բազմաթիվ նախագծեր, որոնք նման են Ռեշտ-Աստարային, մասնավորապես Իրանի, Պակիստանի և Թուրքիայի միջև։

«Այնուհետև հնարավոր է ուժեղացնել երկաթուղային ենթակառուցվածքը Իրանի և Իրաքի միջև»,- ասել է Ռաիսին։

Պուտինն իր հերթին նախագիծն անվանել է մեծ իրադարձություն տարածաշրջանի, համաշխարհային տրանսպորտային ենթակառուցվածքի, ինչպես նաև Ռուսաստանի և Իրանի համար՝ հույս հայտնելով, որ Մոսկվան, Թեհրանն ու Բաքուն կկարողանան շուտով համաձայնության գալ Հյուսիս-Հարավ միջանցքի շուրջ։

Տաթև Ֆռանգյան