Էրդողանը հաղթելով՝ ագրեսիվ և կտրուկ կդառնա արտաքին ճակատում․ ՀՀ-ի հարցում խստացման ականատես կլինենք․ Էլյա Հարությունյան․ ՏԵՍԱՆՅՈՒԹ

Թուրքիայի Բարձրագույն ընտրական հանձնաժողովի նախագահ Ահմեդ Յեները պաշտոնապես հայտնել է, որ նախագահի թեկնածուներից ոչ մեկին չի հաջողվել ստանալ 50%+1 քվե, ուստի նախագահական ընտրությունները տեղափոխվում են 2-րդ փուլ, որը տեղի կունենա մայիսի 28-ին։ Թուրքիայի իշխող ուժի «Ժողովրդական դաշինքի» միասնական թեկնածու Ռեջեփ Թայիփ Էրդողանը հավաքեց 49.50% և ընդդիմադիր «Ազգային դաշինքի» միասնական թեկնածու Քեմալ Քըլըչդարօղլուն՝ 44.89%:

Ընտրությունների արդյունքում՝ Թուրքիայի խորհրդարանում մեծամասնություն կկազմի Էրդողանի գլխավորած «Ժողովրդական դաշինքը»՝ 49.46%-ով։

Ընտրություններից առաջ որոշակի լարում առաջացավ Հայաստան-Թուրքիա հարաբերություններում։ «Նեմեսիս» արձանի տեղադրումը պատճառաբանելով՝ Չավուշօղլուն հայտարարեց, թե ՀՀ-ի հետ կարգավորման գործընթացը կտուժի, եթե արձանը չապամոնտաժվի։ ՀՀ-ից պատասխանեցին, որ կառավարությունը չի եղել որոշողը, վարչապետն ասաց՝ սխալ էր դնել այդ արձանը, իսկև ԱԽ քարտուղարն ասաց՝ ՀՀ-ի ներքին գործն է։

Factor TV-ի հարցազրույցում թուրքագետ Էլյա Հարությունյանին հարց ուղղեցինք՝ եթե Էրդողանը հաղթի, ի՞նչ քաղաքականություն կորդեգրի ՀՀ-ի հանդեպ։

«Ալիևը լրջորեն աջակցել է Էրդողանին նախագահական պայքարում։ Եթե Թուրքիայի ընդդիմությունը հաղթի, Ադրբեջանին դժվար կլինի ջերմ հարաբերություններ հաստատել Քըլըչդարօղլուի ուժի հետ։ Իսկ եթե Էրդողանը հաղթի, ագրեսիվ և կտրուկ կդառնա արտաքին ճակատում՝ ՀՀ-ի հարցում խստացման ականատես կլինենք»,- ասաց թուրքագետը։

Հարցազրույցն ամբողջությամբ՝ տեսանյութում։

Ռոբերտ Անանյան