05.06.2026 | 19:30
ՀՀ-ն զենք է վաճառել 2 երկրի․ նոր երկրների վաճառքներ կլինեն․ Մխիթար Հայրապետյան․ ՏԵՍԱՆՅՈՒԹ
Հայտնի է «Եվրատեսիլ 2023»-ի հաղթողը
Մշակույթ
14.05.2023 | 03:01
Լիվերպուլում անցկացված «Եվրատեսիլ 2023» երգի միջազգային մրցույթում հաղթեց Շվեդիայի մասնակից Լորինը՝ «Tattoo» երգով։ Նա ստացավ 583 միավոր։ Շվեդիայի մասնակիցը մրցույթում հաղթում է արդեն 2-րդ անգամ։
Երկրորդ հորիզոնականը զբաղեցրեց Ֆինլանդիան՝ 526 միավորով, երրորդը՝ Իսրայելը՝ 362 միավորով։
Հայաստանի պատվիրակ Բրյունետը (Ելեն Երեմյան) զբաղեցրեց 14-րդ հորիզոնականը՝ 122 միավորով։ Նա ելույթ ունեցավ իր իսկ հեղինակային «Future lover» երգով։
Հեռուստադիտողների քվեարկությանը գումարվեցին ազգային ժյուրիի քվեարկության արդյունքները։ Հայաստանի ժյուրին ամենաբարձր՝ 12 միավորը տվեց Իսրայելին, 10 միավոր՝ Շվեդիային։ Հայաստանը որևէ երկրից չստացավ 12 միավոր, 10 միավոր Հայաստանը ստացավ Վրաստանից ու Ալբանիայից։ Ի դեպ, թե՛ Իսրայելը, թե՛ Շվեդիան Հայաստանին որևէ միավոր չտվեցին։ Հայաստանի ժյուրիի կազմում էին Հրաչ Քեշիշյանը, Սոնա Ռուբենյանը, Դավիթ Բադալյանը, Արսեն Գրիգորյանը, Վահագն Գևորգյանը։
Ազգային ժյուրիի կողմից Բրյունետը ստացավ 69, իսկ հեռուստադիտողի կողմից՝ 53 միավոր: Բրյունետը մրցույթի ֆավորիտներից էր, նրա «Future lover» երգի տեսահոլովակը Եվրատեսիլի YouTube-ի պաշտոնական ալիքում դիտվել է ավելի քան 6 միլիոն անգամ՝ երկրորդը Շվեդիայի պատվիրակ Լորինի «Tattoo» տեսահոլովակից հետո:
Նշենք, որ հաղթող ճանաչվելու համար պայքարում էին 26 երկրների ներկայացուցիչներ։ Համերգը բացեց Ավստրիան, եզրափակեց հյուրընկալող պետությունը՝ Միացյալ Թագավորությունը: Ադրբեջանը եզրափակիչ փուլ չէր անցել։ Մրցույթին չէր մասնակցում Ռուսաստանը։
Հիշեցնենք՝ «Եվրատեսիլ 2022»-ում հաղթել էր Ուկրաինան ներկայացնող Kalush Orchestra խումբը։
Արփի Հակոբյան
