Քաղաքականություն
12.05.2023 | 20:02Factor TV-ի հարցազրույցը քաղաքագետ Հարություն Մկրտչյանի հետ
-Բրյուսելում մայիսի 14-ին նախատեսված Փաշինյան-Ալիև-Միշել հանդիպումից մի քանի օր առաջ, փաստորեն, Ադրբեջանը ռազմական սադրանք է իրականացնում ՀՀ սուվերեն տարածքների նկատմամբ՝ Սոթքի ուղղությամբ, այսօր կիրառել է նաև ԱԹՍ, ունենք վիրավորներ, և ԱԹՍ-ն ոչնչացվել է։ Ինչի՞ է ձգտում Ադրբեջանը՝ այս փուլում ռազմական գործողություններ իրականացնելով։
-ԱՄՆ-ի Պետքարտուղարության տարածած հայտարարությունից, եթե փորձենք եզրակացություններ անել, ապա ադրբեջանական կողմը փորձում է վիժեցնել Վաշինգտոնում ձեռք բերված պայմանավորվածությունները։ Կողմերը, ըստ պաշտոնական Վաշինգտոնի, ձեռք են բերել պայմանավորվածություն, որ շատ մոտ ապագայում կգնան զորքերի հայելային հետքաշման։ Գլոբալ առումով ադրբեջանական կողմի համար ավելի շահեկան է մոսկովյան հարթակը, որովհետև այնտեղ, եթե ոչ բացահայտ, ապա քողարկված պաշտոնական Մոսկվան Բաքվի շահերն է սպասարկում։
-Ինչո՞ւ է մոսկովյան հարթակը ձեռնտու Բաքվին։ ՀՀ վարչապետը Մոսկվայում՝ Կարմիր հրապարակում շքերթի էր մասնակցում, իսկ Ալիևն ԱՊՀ երկրների այն առաջնորդներից էր, որը ներկա չէր։ Տրամաբանությունը պետք է հուշի, որ Պուտինի կարծիքն ավելի շատ դրական պետք է լինի Հայաստանի նկատմամբ, քան Ադրբեջանի։
-Հերթական անգամ Ալիևն իր դիվանագիտությամբ հաղթեց Փաշինյանին։ Նա բազմիցս ապացուցել է, որ խաղում է թե՛ արևմտյան, թե՛ ռուսական հարթակներում, բայց ավելի շատ նրա շահերը սպասարկում է ռուսական կողմը։ Արևմտյան հարթակում խաղալու լավագույն առիթ ստեղծվեց՝ այդ բեմականացված միջոցառմանը չգնալով, և չհայտնվելով ռազմական հանցագործություն գործող Պուտինի կողքին։ Այս առումով Ալիևը դիվիդենտներ շահեց Արևմուտքից։
-Հաշվարկը ո՞րն էր, այն, որ Արևմուտքի աչքում Պուտինը և Փաշինյանը նույնացա՞ն։
-Ադրբեջանական մամուլում վերջին օրերին անընդհատ կարմիր գծով տարվում է այն թեզը, որ Հայաստանը շարունակում է մնալ Ռուսաստանի դաշնակիցը, և որ ՀՀ վարչապետը, գնալով Մոսկվա, ստացել է հրահանգներ Պուտինից, և այս սահմանային լարվածությունը ՀՀ-ի և ՌԴ-ի նախագահի վառ երևակայության արդյունքն է։
Հարցազրույցն ամբողջությամբ՝ տեսանյութում։
Ռսոբերտ Աանանյան
