Գերմանիան միտված է աջակցելու Հայաստանի և Ադրբեջանի միջև դիվանագիտական ջանքերին. ՀՀ-ում Գերմանիայի դեսպան

Գերմանիայի մասնակցությունը Քիշնևում հունիսի 1-ին նախատեսված հնգակողմ հանդիպմանը միտված է աջակցելու Հայաստանի և Ադրբեջանի միջև դիվանագիտական ջանքերին։ Հանդիպմանն ընդառաջ՝ այս մասին հայտարարում է Հայաստանում Գերմանիայի դեսպան Վիկտոր Ռիխտերը։

«Մենք միտված ենք հարատև խաղաղության ապահովմանը Հարավային Կովկասում: Խոսքը վերաբերում է նաև քաղաքական, տնտեսական և միջանձնյա հարաբերությունների զարգացման հնարավորություններին ամբողջ տարածաշրջանում: Մենք միտված ենք աջակցելու Հայաստանի և Ադրբեջանի միջև դիվանագիտական ջանքերի իրականացմանը: Եվ այս առումով մենք նախատեսել ենք նաև հանդիպումներ, խոսքը նաև Քիշնևում հունիսի 1-ին Եվրոպական համայնքի գագաթնաժողովի մասին է: Այստեղ Գերմանիայի մասնակցությունը ենթադրում է նաև միտվածություն բավական նշանակալի արդյունքների ապահովմանը»,- հավելեց նա։

Հայաստանի և Գերմանիայի հարաբերություններին նվիրված՝ «Հայ-գերմանական դիվանագիտական հարաբերությունների 30 տարին» գրքի շնորհանդեսին ունեցած ելույթում դեսպանը խոսեց նաև Հայաստանի և Գերմանիայի երկկողմ հարաբերություններից, ընդգծեց, որ երկու երկրների հարաբերությունները շարունակաբար զարգացել են, ընդլայնվել, քաղաքական երկխոսությունը շարունակվում է: Սերտ կապեր են ձևավորված գերմանական Բունդեսթագի և Հայաստանի ԱԺ-ի միջև:

Դեսպան Ռիխտերը կարևորեց նաև ՀՀ վարչապետ Նիկոլ Փաշինյանի և ԱԳ նախարար Արարատ Միրզոյանի այս տարվա այցը Բեռլին:

«Շատ արգասաբեր քննարկումներ են ունեցել, ինչը, վստահաբար, անդրադարձել է մեր երկրների համագործակցության պոտենցիալի վրա, ընդգծել ենք համագործակցության ընդլայնման ուղղությունները: Գերմանիայի և Հայաստանի միջև համագործակցության ուղղություններից են տեխնիկական ու ֆինանսական համագործակցությունները: Եվ այստեղ Գերմանիան տարիներով աջակցել է Հայաստանում ժողովրդավարական բարեփոխումների գործընթացին»,- ասաց Վիկտոր Ռիխտերը:

Ըստ նրա՝ Հայաստանն ու Գերմանիան ակտիվ համագործակցել են նաև մշակույթի, գիտության, կրթության ոլորտներում, իսկ համագործակցության բեկումնային կետերից մեկը Հայոց ցեղասպանության ճանաչումն է: Վիկտոր Ռիխտերի գնահատմամբ՝ այդ փաստը նպաստել է նաև նման հանցագործության կանխման գործընթացին ամբողջ աշխարհում:

«Մենք շատ ուրախ ենք, որ Հայաստանը շատ հանձնառու կերպով իրականացնում է ԵՄ-ի հետ կնքված Համապարփակ և ընդլայնված գործընկերության համաձայնագիրը: Եվ կարծում եմ, որ ՀՀ կառավարության ներկայիս ծրագիրը լավ հարթակ ու շրջանակ է՝ բարեփոխումները նաև ապագայում ակտիվորեն շարունակելու համար»,- հավելեց ՀՀ-ում Գերմանիայի դեսպանը:

Շողիկ Գալստյան