Բրյունետը ելույթ կունենա այսօր՝ երկրորդ համարի ներքո

Այսօր՝ Երևանի ժամանակով 23։00-ին, Մեծ Բրիտանիայի Լիվերպուլ քաղաքում տեղի կունենա Եվրատեսիլ 2023-ի երկրորդ կիսաեզրափակիչը։ Միջազգային մրցույթում Հայաստանը ներկայացնող Բրյունետը (Էլեն Երեմյան) ելույթ կունենա երկրորդ համարի ներքո՝ իր «Future lover» երգով։

Հայաստանից Բրյունետի օգտին քվեարկել հնարավոր չէ։ Նրա օգտին քվեարկելու համար հարկավոր է 02 թիվն ուղարկել ձեր երկրում առանձնացված կարճ համարին: Քվեարկությանը կարող են մասնակցել այսօր ելույթ ունեցող երկրները՝ Ալբանիան, Ավստրիան, Ավստրալիան, Բելգիան, Կիպրոսը, Դանիան, Էստոնիան, Հունաստանը, Վրաստանը, Իսլանդիան, Լիտվան, Լեհաստանը, Ռումինիան, Սլովենիան, Սան Մարինոն, Մեծ հնգյակից Իսպանիան և Միացյալ Թագավորությունը, ինչպես նաև նախորդ տարվա հաղթող Ուկրաինան: Քվեարկել հնարավոր է նաև մրցույթին չմասնակցող երկրներից՝ www.esc.vote կայքի օգնությամբ: Հարկավոր է մուտք գործել www.esc.vote կայք և համոզվել, որ ձեր բանկային ու հեռախոսային քարտերը միջազգայնորեն ճանաչված են: Օրինակ՝ եթե ցանկանում եք քվեարկել ԱՄՆ-ից, ապա ձեր բանկային և հեռախոսային քարտերը պետք լինեն ամերիկյան:

Մեկ բանկային քարտից հնարավոր է քվեարկել միանգամից 20 անգամ: Սա նշանակում է, որ եթե ցանկանում եք 20 ձայն տալ Հայաստանի օգտին, ապա դա պետք է միանգամից անել, քանի որ մեկ քարտով հնարավոր չէ երկրորդ անգամ քվեարկել: Այս կերպ արված քվեարկությունը դիտարկվելու է որպես մեկ երկրից ստացված ձայն:

Հիշեցնենք, որ մայիսի 9-ին տեղի էր ունեցել առաջին կիսաեզրափակիչը, որի ժամանակ եզրափակիչ փուլ են անցել հետևյալ երկրները` Նորվեգիա, Խորվաթիա, Մոլդովա, Շվեյցարիա, Ֆինլանդիա, Չեխիա, Իսրայել, Պորտուգալիա, Շվեդիա, Սերբիա:

Նշենք, որ Ադրբեջանը եզրափակիչ փուլ չի անցել։

Եվրատեսիլ 2023-ի եզրափակիչը տեղի կունենա մայիսի 13-ին։

Արփի Հակոբյան