Հագուստն ու կոշիկը թանկացել են, ոսկերչական զարդերը՝ էժանացել․ ՏԵՍԱՆՅՈՒԹ

Այս տարվա ապրիլին, նախորդ տարվա նույն ամսվա համնեմատ, ոչ պարենային ապրանքները թանկացել են 2.7%-ով։ Այս մասին տեղեկանում ենք Վիճակագրական կոմիտեից։ Այսպիսով՝ 1 տարվա կտրվածքով թանկացել են հետևյալ ապրանքները՝

• Հագուստ՝ 5.8%-ով
• Կոշիկ՝ 8.1%-ով
• Բնակարանի նորոգման և սպասարկման նյութեր՝ 3.9%-ով
• Կահույք՝ 6.2%-ով
• Կենցաղային խոշոր սարքեր՝ 5.3%-ով
• Կենցաղային փոքր էլեկտրական սարքեր՝ 4.7%-ով
• Ամանեղեն, սպասք՝ 7.8%-ով
• Ձեռքի գործիքներ՝ 4.9%-ով
• Դեղագործական ապրանքներ՝ 1.7%-ով
• Բժշկական սարքավորումներ և սարքեր՝ 3.1%-ով
• Բժշկական այլ արտադրանք՝ 5.1%-ով
• Սիրողական այգեգործական ապրանքներ՝ 3.1%-ով

Էժանացել են՝

• Ոսկերչական զարդեր՝ 11.7%-ով
• Անձնական փոխադրամիջոցների համար վառելանյութն ու քսանյութեր՝ 6.8%-ով

2023 թվականի ապրիլին, 2022-ի ապրիլի համեմատ, հանրապետությունում գրանցվել է բենզինի և դիզելային վառելիքի աճ, համապատասխանաբար, 28.9% և 11.8%-ով: Իսկ 1 ամսվա ընթացքում բենզինի և դիզելային վառելիքի գները նվազել են, համապատասխանաբար, 1.6% և 2.7%-ով:

Նշենք, որ Հայաստանում հեղուկ գազի շուկայում վերջին 2 շաբաթվա ընթացքում հեղուկ գազի դեֆիցիտ էր առաջացել, միաժամանակ, հեղուկ գազի գինը կրկնակի թանկացել է՝ 110-120 դրամից հասնելով 200-250 դրամի։

Խնդիրը Լարսի անցակետում հերթերն են։ Ռուսական կողմում 2 ռենտգեն սարքավորումները չէին աշխատում, ինչի պատճառով գազով բեռնված մեքենաները չեն կարողանում հասնել Հայաստան։ Ռուսաստանում ՀՀ դեսպանության մաքսային կցորդ Վահան Հակոբյանը Factor TV-ին տեղեկացրեց, որ արդեն շուրջ 1 շաբաթ է՝ վերականգնվել է այդ սարքերի աշխատանքը և հերթերը սկսել են կրճատվել։

Գազատարները վրացական կողմից հասել են Ռուսաստան, լիցքավորվում են և արդեն հետ են վերադառնում Հայաստան։ Նրա խոսքով՝ այժմ Հայաստանից դուրս է եկել և Ռուսաստանի սահմանը չի հատել մոտ 700 հայկական բեռնատար։ Հակառակ կողմում մոտ 100 բեռնատար է սպասում Հայաստան մտնելուն։

Մանրամասները՝ տեսանյութում։

Անժելա Պողոսյան