07.09.2026 | 16:58
Երևանի գերեզմանատան հարակից տարածքում «ԱԿ-47» ինքնաձիգ և փամփուշտներ են հայտնաբերվել
24 դպրոց և 46 մանկապարտեզ` 170 դպրոցի և 130 մանկապարտեզի փոխարեն. խոստացվածը չի կատարվել
Տնտեսություն
11.05.2023 | 20:45
Հայաստանի կառավարությունը 2021 թվականից սկսել է 300 դպրոց և 500 մանկապարտեզ կառուցելու և վերանորոգելու ծրագիրը։ Այն նաև ներառված է 2021-2026 թվականների կառավարության ծրագրում։ Ըստ այդմ՝ մինչև 2026 թվականը պետք է կառուցվի և հիմնանորոգվի 337 դպրոց և 521 մանկապարտեզ։
2021 թվականի վերջին վարչապետ Նիկոլ Փաշինյանի գլխավորությամբ կայացած խորհրդակցության ժամանակ գործադիր մարմինը քննարկել էր այդ ծրագրի ընթացքը։ 2022 թվականին, նախնական պլանի համաձայն պետք է կառուցվեր և հիմնանորոգվեր 170 դպրոց և 130 մանկապարտեզ։ Ընդ որում՝ սրանում չէին ներառվելու սուբվենցիոն և այլընտրանքային ծրագրերը:
Սակայն նշված արդյունքները չեն իրականացել, քանի որ կառավարության 2022 թվականի կատարման արդյունքների և ընթացքի մասին զեկույցում նշված է՝ կառուցման և հիմնանորոգման աշխատանքներն ավարտվել են 24 դպրոցում և 46 մանկապարտեզում։
Ընդ որում՝ 2022 թվականի կառավարության կատարողականը և ԿԳՄՍ նախարարության հարցման պատասխանները հակասում են միմյանց։ ԿԳՄՍ նախարարությունը ավելի մեծ թվեր է հայտնում, թեև նախարարության ներկայացրածը նույնպես պակաս է խոստացված ցուցանիշից։
Factor.am-ը նաև հարցում էր ուղարկել ԿԳՄՍ նախարարություն՝ հասկանալու, թե արդյոք 2022-ի նախատեսած արդյունքները իրականացել են։ Նախարարությունից հայտնել են, որ 2022 թվականին ավարտվել են 94 դպրոցի և 38 մանկապարտեզի շինարարական աշխատանքներ, իսկ մասնակի նորոգվել է 86 դպրոց։ Նաև ավելացրել են՝ ավարտվել են ևս 27 մանկապարտեզի հիմնանաորգման աշխատանքներ։
2022 թվականի կառավարության կատարողականում պատկերն այլ է՝ վերակառուցման, կառուցման և հիմնանորոգման աշխատանքներն ավարտին են հասցվել 24 դպրոցում և 46 մանկապարտեզում։
2023 թվականին ԿԳՄՍ նախարարությունը նախատեսում է ավարտին հասցնել 21 դպրոցի և 16 մանկապարտեզի կառուցման աշխատանքները:
Հավելենք որ ծրագիրն իրականացվում է ոչ միայն ԿԳՄՍ նախարարության բյուջեով, այլ նաև Տարածքային կառավարման և ենթակառուցվածքների նախարարության, ինչպես նաև՝ արտաքին աղբյուրների միջոցներով:
Սոնա Հովսեփյան
