Քաղաքականություն
08.05.2023 | 12:19
Հինգ տարի առաջ՝ 2018 թվականի մայիսի 8-ին, Նիկոլ Փաշինյանն Ազգային ժողովում ընտրվեց ՀՀ վարչապետ։ Փաշինյանը ՀՀ վարչապետի թեկնածու էր առաջադրվել երրորդ նախագահ Սերժ Սարգսյանի և Հանրապետական կուսակցության հետագա իշխանավարման դեմ սկսած լայնամասշտաբ անհնազանդության գործողությունների արդյունքում։ Նրա վարչապետ դառնալու օգտին քվեարկեց 59, դեմ՝ 42 պատգամավոր:
Փաշինյանին սատարում էին Ազգային ժողովի ՀՅԴ, «Ելք», «Ծառուկյան» խմբակցությունները, իսկ խորհրդարանական մեծամասնությունը՝ «Հանրապետական» խմբակցությունը, օժանդակեց 10 քվեով։
Նիկոլ Փաշինյանն իշխանության եկավ բազմաթիվ խոստումներով, որոնք առնչվում էին Հայաստանի ու Արցախի անվտանգության ամրապնդմանը, մարդու իրավունքների պաշտպանությանը, կոռուպցիայի բացառմանը, պետությունից գողացված միջոցների հետ վերադարձին և հաշվետու ու թափանցիկ կառավարություն ունենալուն։
Այս խոստումների մեծամասնությունը, փորձագետների ու իրավապաշտպանների գնահատականներով, ոչ միայն չի իրականացել, այլև Փաշինյանի իշխանության տարիներին հայկական կողմն Արցախի շրջանների և Հայաստանի սուվերեն տարածքների կորուստներ է ունեցել, արցախահայությունը կանգնած է էթնիկ զտման և ցեղասպանության վտանգի առաջ, առկա են անվտանգային լուրջ խնդիրներ։
Նարեկ Կիրակոսյան
