21.12.2025 | 22:02
Ֆուտզալի Հայաստանի հավաքականը հաղթեց Մոլդովային
Եվրամիությունը ողջունում է Հայաստանի և Ադրբեջանի ԱԳ նախարարների կայուն ներգրավվածությունը քառօրյա բանակցություններին․ Տոյվո Կլաար
Քաղաքականություն
06.05.2023 | 11:43
Հարավային Կովկասի և Վրաստանում ճգնաժամի հարցերով ԵՄ հատուկ ներկայացուցիչ Տոյվո Կլաարը անդրադարձել է վաշինգտոնյան բանակցություններին։
«Հուսադրող նորություններ Վաշինգտոնից. Եվրամիությունը ողջունում է Հայաստանի և Ադրբեջանի ԱԳ նախարարների կայուն ներգրավվածությունը քառօրյա բանակցություններին: Առաջընթաց կարող է լինել միայն երկխոսության միջոցով. Մենք շարունակում ենք մնալ Հայաստանի և Ադրբեջանի կողքին և աշխատել մեր գործընկերների հետ՝ կայուն խաղաղության ձգտմամբ»,- թվիթերի իր էջում գրել է Կլաարը։
Հիշեցնենք, որ մայիսի 1-ից 4-ը Վաշինգտոնում կայացել էր ՀՀ ԱԳ նախարար Արարատ Միրզոյանի և ԱՄՆ պետքարտուղար Էնթոնի Բլինքենի հանդիպումը: Այնուհետև տեղի էր ունեցել նաև Ադրբեջանի ԱԳ նախարար Ջեյհուն Բայրամովի և ԱՄՆ պետքարտուղար Էնթոնի Բլինքենի հանդիպումը, որին հաջորդել էր եռակողմ՝ Միրզոյան-Բլինքեն-Բայրամով հանդիպումը։
Քննարկվել էին տարածաշրջանում ստեղծված անվտանգային իրավիճակի, Հայաստանի և Ադրբեջանի միջև հարաբերությունների կարգավորման գործընթացի հարցեր: Անդրադարձ էր կատարվել Ադրբեջանի կողմից Լաչինի միջանցքի ապօրինի արգելափակման հետևանքով ստեղծված հումանիտար իրավիճակին:
Ապա Արարատ Միրզոյանը և Ադրբեջանի արտաքին գործերի նախարար Ջեյհուն Բայրամովը մայիսի 1-4-ն Արլինգթոնում (ԱՄՆ Վիրջինիա նահանգ) անցկացրել էին բանակցություններ:
Հանդիպումից հետո ԱՄՆ պետքարտուղար Բլինքենը հայտարարել էր, որ Հայաստանի և Ադրբեջանի արտգործնախարարները գրանցել են շոշափելի առաջընթաց, և խաղաղության համաձայնագիրն արդեն հասանելիության տիրույթում է։
Իսկ ՀՀ ԱԳՆ-ն հանդիպումը մեկնաբանելով նշել էր՝ կա փոխըմբռնման առաջընթաց, սակայն առանցքային հարցերի շուրջ դիրքորոշումները մնում են տարամետ։
