15.08.2026 | 14:14
Ինդոնեզիայում տեղի է ունեցել 7,7 մագնիտուդ ուժգնությամբ երկրաշարժ, կա առնվազն 20 զոհ
ՀՀ-Ֆրանսիա ռազմական համագործակցության քայլեր․ Intelligence Online-ի անդրադարձը
Քաղաքականություն
28.04.2023 | 19:46
Փարիզը շուտով կարող է պաշտպանական կցորդ նշանակել Երևանում Ֆրանսիայի դեսպանատանը, հայտնում է Intelligence Online պորտալը։
Ըստ հոդվածագրի՝ թեև նման առաջադրումն առաջին հայացքից կարող է ոչ նշանակալից թվալ, սակայն այն կարող է լինել «Հայաստանի հետ սեփական ռազմական կապը հաստատելու Ֆրանսիայի ցանկության արտահայտությունը՝ այսպիսով վերջակետ դնելով ՀՀ-ի ռազմական բացառիկ հարաբերությանը Մոսկվայի հետ և´ վստահության, և´ զենքի ձեռք բերման առումով»:
Պաշտպանական կցորդի դերը այս պահին Վրաստանից կատարում է գնդապետ Ֆրեդերիկ Կամպոսը։ Ապրիլի սկզբին ֆրանսիացի դիվանագետը մասնակցել է Հայաստանի ազգային անվտանգության խորհրդի քարտուղար Արմեն Գրիգորյանի և ֆրանսիական գնումների գործակալության՝ DGA-ի պատվիրակության հանդիպմանը՝ Մարի-Ագնես Պիկարդ-Շեսելի գլխավորությամբ, որը ռուսական պաշտպանական շուկայի հետ աշխատելու փորձ ունի:
Պարբերականը գրում է, որ հնարավոր նշանակումը համընկնում է Փարիզի ու Երևանի միջև Սպառազինությունների երկկողմ կոմիտեի վերականգնման հետ։ Այս մարմինը սահմանում է Հայաստանի պաշտպանության նախարարության ռազմավարական ծրագրերը և ֆրանսիական արտադրողներից հնարավոր ձեռքբերումները: Այս դիվանագիտական շարժը տեղի է ունենում այն ժամանակ, երբ Հայաստանի և Ադրբեջանի միջև հակամարտությունն ուշադրությամբ վերահսկվում է ուկրաինական հակամարտության մեջ ներգրավված բոլոր կողմերի կողմից:
«Մոսկվան ցանկանում է կառչել Լեռնային Ղարաբաղում հրադադարի հարցում միջնորդի դերից, մինչդեռ Ուկրաինան և Արևմուտքը փորձում են իրենց կողմը գրավել Հարավային Կովկասին՝ Ռուսաստանին մեկուսացնելու համար: Թուրքիան իր հերթին վճռականորեն պաշտպանում է Ադրբեջանի պահանջները։ Սակայն, այնուամենայնիվ, ֆրանսիական ռազմական-գործարար ջանքերը Հայաստանում կարող են շատ արդյունք չտալ, Հայաստանի սահմանափակ ֆինանսների պատճառով։ Վերջին մի քանի տարիների ընթացքում ֆրանսիական պաշտպանական ընկերությունները հիմնականում հրապուրվել են Բաքվով, որն ունի կայուն նավթային և ֆինանսական ռեսուրսներ։ Սակայն Ֆրանսիայի ջանքերին մեծ հարված հասցվեց 2022 թվականի մարտին, երբ նրա արժեքավոր դաշնակից նախագահ Արմեն Սարգսյանը հրաժարական տվեց։ Նախկին ղեկավարը տարածաշրջանում հանդես է եկել որպես բիզնես գործակալ բազմաթիվ ֆրանսիական ընկերությունների համար, այդ թվում՝ Thales, Areva և Alstom»,- ամփոփում է հոդվածագիրը:
Տաթև Ֆռանգյան
