Մշակույթ
28.04.2023 | 09:55
Հարկ վճարողի օրվան նվիրված համերգ կազմակերպելու համար Ռուստամ Բադասյանի ղեկավարած Պետական եկամուտների կոմիտեն հարկատուների հաշվից ծախսել է 11 մլն 504 հազար դրամ։ Այս մասին Factor.am-ի հարցմանն ի պատասխան հայտնում են գերատեսչությունից։
Շուրջ 12 մլն դրամ արժեցած համերգը տեղի է ունեցել Արամ Խաչատրյան համերգասրահում՝ Հայաստանի պետական սիմֆոնիկ նվագախմբի մասնակցությամբ՝ դիրիժոր Սերգեյ Սմբատյանի գլխավորությամբ։ Հարկատուների համար կազմակերպված համերգը տևել է 90 րոպե, ներկա է եղել 1280 հյուր։ Հարկ վճարող ութ իրավաբանական անձ էլ արժանացել է անվանական հուշանվերի, որոնցից յուրաքանչյուրի արժեքը 25 հազար դրամ է։
Factor.am-ը Ռուստամ Բադասյանին ուղղված հարցմամբ հետաքրքրվել էր՝ ինչպե՞ս են ընտրվել հարկ վճարողները, որոնք հնարավորություն են ունեցել ներկա գտնվել հարկատուների հաշվին կազմակերպված հանդիսավոր միջոցառմանը։ ՊԵԿ-ից, առանց մեխանիզմները բացահայտելու, նշել են, որ միջոցառմանը ներկա են եղել գործադիր, օրենսդիր, դատական իշխանությունների բարձրաստիճան պաշտոնյաներ, օտարերկրյա կազմակերպությունների ներկայացուցիչներ և դեսպաններ, ինչպես նաև՝ ՊԵԿ աշխատակիցներ։
Ըստ էության՝ միջոցառումը կազմակերպվել է միայն «էլիտար» հարկ վճարողների համար։ Իսկ ահա, օրինակ, սահմանամերձ բնակավայրում աշխատող և օրինապահ հարկ վճարող գեթ մեկ քաղաքացու Ռուստամ Բադասյանի ղեկավարած կառույցից հարկ չեն համարել հրավիրել հարկ վճարողի օրվան նվիրված միջոցառմանը։
Նարեկ Կիրակոսյան
