Փաշինյանն ու Պուտինը խոսել են Լաչինի շուրջ․ ՀՀ-ն Բաքվի անցակետի հարցով դիմեց Հաագայի դատարան․ Լուրեր

• Վարչապետ Նիկոլ Փաշինյանը հեռախոսազրույց է ունեցել Ռուսաստանի նախագահ Վլադիմիր Պուտինի հետ։ Քննարկվել են Լաչինի միջանցքին և Լեռնային Ղարաբաղում ստեղծված հումանիտար իրավիճակին վերաբերող հարցեր: Այլ մանրամասներ չեն հաղորդվել։
• Հայաստանը ծանուցում է ուղարկել Արդարադատության միջազգային դատարան: Այս մասին Factor.am-ին հայտնեց Միջազգային իրավական հարցերով ՀՀ ներկայացուցչի մամուլի խոսնակ Հասմիկ Սամվելյանը։ Ծանուցմամբ Հայաստանը դիմել է Արդարադատության միջազգային դատարան Լաչինի միջանցքում Ադրբեջանի կողմից անցակետ ստեղծելու հարցով։
• Եվրախորհրդարանի մի քանի պատգամավորներ՝ Հարավային Կովկասի հետ հարաբերությունների պատվիրակության ղեկավար Մարիա Կայլուրանդը, Հայաստանի հարցերով զեկուցող Անդրեյ Կովատչևը, Ադրբեջանի հարցերով զեկուցող Ժելյանա Զովկոն համատեղ հայտարարությամբ են հանդես եկել Բաքվի կողմից Լաչինի միջանցքի հետ կապված իր միջազգային պարտավորությունների բացահայտ անհարգալից վերաբերմունքի մասին։ Հայտարարության հեղինակները հիշեցնում են, որ Ադրբեջանի կողմից Լաչինի միջանցքի շրջափակումը սկսվել է 2022 թվականի դեկտեմբերի 12-ից՝ Լեռնային Ղարաբաղի բնակչությանը հումանիտար դժվարություններ պատճառելով և մեծապես խաթարելով խաղաղության հեռանկարները։ Իսկ վերջին գործողություններն է՛լ ավելի են սրում իրավիճակը։ Պաշտոնյաները կոչ են անում Բաքվին անհապաղ շրջել իր ընթացքը և պարտավորվել հարգել Լեռնային Ղարաբաղի հակամարտության խաղաղ կարգավորմանը հավատարմությունն ու միջազգային պարտավորություններն ու նորմերը։

Այս ժամի լուրերը՝ տեսանյութում։