25.06.2026 | 17:07
Ընթացքի մեջ է Կարապետյանի` քաղաքացիություններից հրաժարվելու գործընթացը. Վարդևանյան․ ՏԵՍԱՆՅՈՒԹ
Հայաստան կժամանի Ֆրանսիայի ԱԳ նախարար Կատրին Կոլոննան
Քաղաքականություն
25.04.2023 | 11:18
Եվրոպայի և արտաքին գործերի նախարար Կատրին Կոլոննան ապրիլի 26-ից 28-ը կմեկնի Ադրբեջան, Հայաստան և Վրաստան․ տեղեկանում ենք Ֆրանսիայի արտաքին քաղաքական գերատեսչության տարածած հաղորդագրությունից։
«Այս այցով Ֆրանսիան ընդգծում է իր հանձնառությունը՝ աջակցելու երկու երկրների միջև արդար, կայուն խաղաղության, տարածքային ամբողջականության և միջազգային իրավունքի սկզբունքների հարգման հիման վրա բանակցություններ անցկացնելուն։ Նաև կոչ է անում երաշխավորել Լեռնային Ղարաբաղի հայ բնակչության իրավունքները և անհապաղ վերականգնել երթևեկությունը Լաչինի միջանցքով։
Բաքվում նախարարը կհանդիպի նախագահ Իլհամ Ալիևի և արտգործնախարար Ջեյհուն Բայրամովի հետ։ Նա նաև հարգանքի տուրք կմատուցի 1990 թվականի հունվարի 20-ի խորհրդային բռնաճնշումների զոհերի հիշատակին։
Երևանում նախարարը կհանդիպի վարչապետ Նիկոլ Փաշինյանի և ԱԳ նախարար Արարատ Միրզոյանի հետ։ Նա կայցելի Ջերմուկում գտնվող Եվրոպական միության դիտորդական առաքելության կենտրոնակայան, ապա Հայոց ցեղասպանության հուշահամալիր։
Նախարարը Վրաստան կայցելի ապրիլի 28-ին։ Հանրապետության նախագահ Սալոմե Զուրաբիշվիլիի, վարչապետ Իրակլի Ղարիբաշվիլիի և արտգործնախարար Իլիա Դարչիաշվիլիի հետ իր բանակցությունների ընթացքում նա իր աջակցությունը կհայտնի օրենքի գերակայության և քաղաքացիական տարածքի պահպանման ոլորտում բարեփոխումներին, որոնք կարևոր են քայլեր են երկիրը Եվրամիությանը մոտեցնելու հարցում»,- ասված է հաղորդագրությունում։
Անահիտ Խաչատրյան
