Ռյազանում հայերի զանգվածային ձերբակալություններ են․ ՏԵՍԱՆՅՈՒԹ

ՌԴ Ռյազան քաղաքում արդեն մի քանի շաբաթ է՝ շարունակվում են հայերի զանգվածային հետապնդումները, որոնք ուղեցկվում են ձերբակալություններով։ Factor.am-ի տեղեկություններով՝ ուժայինների դիմակավորված աշխատակիցները ներխուժում են տեղի հայերին պատկանող հաստատություններ, նախ ջարդուփշուր անում անվտանգության տեսախցիկները, կամ թանկարժեք լինելու դեպքում՝ դրանք վերցնում ու սկսում են բռնություն կիրառել, իսկ հետո բերման ենթարկել։ Հետապնդման են ենթարկվում անգամ ՌԴ քաղաքացիություն ունեցող հայկական ծագմամբ անձինք։

Ըստ նախնական տեղեկությունների՝ բռնության նման ալիքի պատճառ է դարձել երեք հայերի նկատմամբ քրեական գործի հարուցումը, ովքեր կենցաղային հողի վրա սրճարաններից մեկում վեճի են բռնկվել Ուզբեկստանի քաղաքացիների հետ։ Դանակահարություն է եղել, իսկ երեք հայ երիտասարդները դիմել են փախուստի։ Այժմ նրանց նկատմամբ հետախուզում է հայտարարված։ Ոստիկանական բաժանմունքում բերման ենթարկված հայերից պահանջում են ասել, թե որտեղ են գտնվում փախուստի դիմած հայերը՝ նրանց մեղադրելով հանցագործներին թաքցնելու մեջ։

Որոշ հայեր, բռնության ենթարկվելու մտավախություններից ելնելով, ստիպված օրեր շարունակ փակ են պահում իրենց հաստատությունները։

Ըստ մեր  տեղեկությունների՝ տեղի հայ համայնքի ղեկավարությունը նման անօրինությունները չդադարելու դեպքում պատրաստվում է դիմել գերագույն դատարան, քանզի մարդկանց իրավունքները ոտնահարվում է զուտ իրենց ազգային պատկանելության հողի վրա։