Մանիպուլյացիա․ Փաշինյանի՝ ՀԴՄ-ով առևտրի թվերը գերագնահատված են

Կառավարություն-Ազգային ժողով հարցուպատասխանի ժամանակ վարչապետ Նիկոլ Փաշինյանը վիճահարույց վիճակագրություն է ներկայացրել Հայաստանում առևտրի ծավալի աճի մասին խոսելիս։ Ապրիլի 12-ին ԱԺ-ում պատգամավորներից մեկի հարցին պատասխանելիս նա ասել է, որ 2023-ի առաջին եռամսյակում Հայաստանում տպվել է 564 մլրդ դրամի ՀԴՄ, որը 48 մլրդ դրամով կամ 9,4 տոկոսով գերազանցում է նախորդ տարվա նույն ժամանակահատվածի ցուցանիշը։ Փաշինյանի համոզմամբ՝ այս փաստը տնտեսական շատ մեծ ցուցանիշի մասին է վկայում։

Այժմ հասկանանք, թե ինչ հնարավոր սցենարներ կան այս ցուցանիշը բնութագրելու համար: Վիճակագրության կոմիտեի տվյալներով՝ 2022-ի առաջին եռամսյակի նկատմամբ այս տարվա առաջին եռամսյակի գնաճը կազմել է 7,2 տոկոս։ Այսպիսով, համեմատությունը ցույց է տալիս, որ Փաշինյանի նշած 9,4 տոկոս աճի մեծ մասը՝ 7,2 տոկոսային կետը, եղել է ոչ թե ապրանքների և ծառայությունների ավելի շատ գնումների, այլ ավելի թանկ գնով գնումների հաշվին։ Գնվել է գրեթե նույնքան ապրանք և ծառայություն, բայց ավելի բարձր գնով։ Ըստ այդմ՝ առևտրաշրջանառության 9,4 տոկոս աճի մասին Փաշինյանի պնդումը մանիպուլյատիվ է։

Ինչ վերաբերում է գնաճին, ապա դրա ամենակարևոր բաժնի՝ սննդամթերք և ոչ ալկոհոլային խմիչքների գնաճը կազմել է 8,1 տոկոս։ Գնաճի ամենաբարձր ցուցանիշը՝ 12,6 տոկոս, գրանցվել է տնային գործածության առարկանների, կենցաղային տեխնիկայի և բնակարանի ընթացիկ սպասարկման բաժնում։ Իսկ ամենացածր ցուցանիշը գրանցվել է կապի ոլորտում՝ 0,5 տոկոս։ Մյուս խմբերի ցուցանիշները՝ գրաֆիկում։