13.01.2025 | 23:21
Հասմիկ Տոլմաջյանը նշանակվել է Շվեյցարիայում ՀՀ դեսպան
Նախկին դատավորը և նրա կինը հրավիրվել են ապօրինի ծագում ունեցող գույքի բռնագանձման վարչություն
Հասարակություն
17.04.2023 | 14:51
Հոկտեմբերի 27-ի ողբերգական գործը քննած նախկին դատավոր Սամվել Ուզունյանը և նրա կինը՝ Ալլա Հարությունյանը, կանչվել են Գլխավոր դատախազության ապօրինի ծագում ունեցող գույքի բռնագանձման վարչություն՝ իրենց հետ կապված վարույթի շրջանակում պարզաբանումներ ներկայացնելու։
Այդ մասին Factor.am-ը տեղեկանում է հրապարակային ծանուցումների «Ազդարար» հարթակից։
«Սամվել Ուզունյանին ու նրա կնոջը առնչվող գույքերի հետ կապված իրականացվել է ուսումնասիրություն, որի արդյունքում կազմվել է ամփոփագիր։ Նրանք հրավիրվել են դիրքորոշում ներկայացնելու»,- նշվում է ծանուցագրում։
Հիշեցնենք՝ նախկին դատավորը 2019 թվականից մեղադրյալի կարգավիճակում է. նա մեղադրվում է 51 հազար դոլար կաշառք ստանալու համար:
Ըստ Դատախազության՝ նախնական քննության ընթացքում հիմնավորվել է, որ Սամվել Ուզունյանը 2014 թվականին քաղաքացիական գործով հայցվորի օգտին դատական ակտ կայացնելու համար միջնորդել, իսկ մյուս դեպքում՝ դեռ 2007-ին տեղի ունեցած հանցագործության քննության ժամանակ տուժողի օգտին գործողություններ է կատարել և իր պաշտոնաեական դիրքն օգտագործել է ենթադրյալ հանցագործությունը կատարած անձանց քրեական պատասխանատվության ենթարկելուն նպաստելու համար: Իր այս գործողությունների համար, ըստ Դատախազության, նախկին դատավորը քաղաքացիներից պահանջել և տարբեր ժամանակահատվածներում ստացել է առանձնապես խոշոր չափերով՝ մի դեպքում 13 հազար դոլարին, մյուս դեպքում՝ 38 հազար դոլարին համարժեք դրամի կաշառք:
Մեղադրանքն առաջադրելու նույն օրը Բարձրագույն դատական խորհուրդը միաձայն որոշում է կայացրել բավարարել Գլխավոր դատախազության երկու միջնորդություններն էլ՝ Սամվել Ուզունյանի նկատմամբ քրեական հետապնդում հարուցելու թույլտվություն է տվել, ինչպես նաև համաձայնություն է տվել նախկին դատավորին ազատությունից զրկելու վերաբերյալ:
Ըստ իրավապահների, երբ նախկին դատավորը որպես մեղադրյալ է ներգրավվել, դատախազությունը նույն օրը Հատուկ քննչական ծառայության քննիչին առաջարկել է ստանալ որոշումներն ու անհապաղ կատարել դատախազի ցուցումները։ Բայց քննիչն ու նրա անմիջական ղեկավարը հայտնել են, որ գլխավոր դատախազի որոշումը կվերցնեն հաջորդ օրը։ Այնինչ այդ ընթացքում Ուզունյանը «Զվարթնոց» օդանավակայանից մեկնում է Մոսկվա։ Այս պահին նախկին դատավորը հետախուզման մեջ է գտնվում։
Ռոզա Վարդանյան
