Ո՞վ ասաց՝ ոտքերի խնդիր ունեցող մարդը պետք է ինքնապաշտպանությունից զրկվի․ Նարեկ Ներսիսյան․ ՏԵՍԱՆՅՈՒԹ

Մեդիա կենտրոնում մեկնարկել է «Հրաժեշտ զենքին. ո՞ր հիվանդությունների դեպքում է ԱՆ-ն արգելում ձեռք բերել, կրել և օգտագործել զենք» թեմայով քննարկումը։

Բանախոսներն են՝«ՈՄԱե («Ողջ մնալու արվեստ») լեռնահրաձգային գումարտակի հրամանատար, առաջին հետախուզադիվերսիոն ջոկատի հիմնադիր, ազատամարտիկ Վովա Վարդանովը, Անվտանգային և ռազմամարզական ոլորտի ներկայացուցիչների միավորման խորհրդի նախագահ Նարեկ Ներսիսյանը, «Ազատազէն» ռազմակրթական հասարակական կազմակերպության ներկայացուցիչը։

Հրավեր է ուղարկվել նաև ՀՀ առողջապահության նախարարություն, սակայն հրավերը մերժվել է։

Կառավարությունն ապրիլի 13-ի նիստում հաստատեց զենքի տիրապետումը խոչընդոտող հիվանդությունների և վիճակների ցանկը: Ավելի վաղ ՀՀ առողջապահության նախարարությունը հանդես էր եկել նոր նախագծով, որով սահմանվելու է զենքի տիրապետմանը խոչընդոտող հիվանդությունների և վիճակների ցանկը։

Այս նախագծով ուժը կորցրած է ճանաչվում ՀՀ կառավարության 2001 թվականի հունիսի 2-ի N 489 որոշումը: Փոփոխությունների համաձայն` զենք ձեռք բերելու, կրելու և օգտագործելու իրավունք չեն ստանում նրանք, ում մոտ առկա է`

1. հոգեկան խանգարումների տեսակներ

2. նյարդային համակարգի հիվանդություններ

3. վնասվածքների հետևանքներ

4. վիրաբուժական մի շարք հիվանդություններ, այդ թվում՝ մաշկի հետայրվածքային, հետվնասվածքային, հետվիրահատական տարածուն սպիներ` վերին վերջույթի շարժումները զգալի չափով սահմանափակող,

5. ողնաշարի և կրծքավանդակի հիվանդություններ

6. զարգացման արատներ

7. վնասվածքների հետևանքներ` ֆունկցիաների զգալի խանգարմամբ, ինչպես նաև ապրելակերպի հետ կապված խնդիրներ:

Նարեկ Ներսիսյանի դիտարկմամբ՝ խնդրին համակարգային լուծում չի տրվում։ «Ինչպես զենք կրելը, առողջապահությունը ևս անվտանգային հարց է․ գիտենք, որ ցավազրկողներ կան, որոնք թմրանյութեր են պարունակում, և բոլոր նորմալ երկրներն ունեն ազգային անվտանգության հայեցակարգ՝ կապված դեղամիջոցների հետ։ Եթե այդ հայեցակարգը չկա, զենքի տիրապետումը խոչընդոտող հիվանդությունների ցանկը հաստատելն էլ է դառնում աբսուրդ։

Բացի դրանից՝ առողջապահության նախարարությունը խախտում է այն անձանց իրավունքները, որոնք ունեն սահմանափակ հնարավորություններ և աշխատունակություն։ Ո՞վ ասաց, որ, օրինակ, ոտքերի խնդիր ունեցող մարդը պետք է ինքնապաշտպանությունից զրկվի»,- ընդգծեց Նարեկ Ներսիսյանը։

Մանրամասները՝ տեսանյութում։