16.05.2026 | 21:37
Փաշինյանը ներկայացրել է վարորդական իրավունքից զրկված անձանց խնդրի լուծման իր տարբերակը
Թուրք հայտնի փաստաբանը Էրդողանի` նախագահի թեկնածության անօրինականության հարցով դիմել է ՄԻԵԴ
Քաղաքականություն
14.04.2023 | 22:20
Թուրք հայտնի փաստաբան, Ստամբուլի փաստաբանների միության նախկին նախագահ Թուրգուտ Քազանը Թուրքիայի Բարձրագույն ընտրական խորհրդի (YSK) որոշումը, որով նախագահ Ռեջեփ Թայիփ Էրդողանը կարող է կրկին առաջադրվել նախագահի պաշտոնում, ներկայացրել է Մարդու իրավունքների եվրոպական դատարան (ՄԻԵԴ), գրում է Bianet-ը։
Կազանը միջնորդություն էր ներկայացրել YSK-ին՝ առարկելով Էրդողանի թեկնածությանը, և նրա դիմումը մերժելուց և թեկնածությունը հաստատելուց հետո դիմել է ՄԻԵԴ-ին։
«Նախագահության ժամկետների սահմանափակման կանոնը, որն ամրագրված է Սահմանադրությամբ, պարտադիր է բոլոր մարմինների, պաշտոնների, լիազորությունների և մարդկանց համար, այդ թվում՝ YSK-ի։ Բոլորովին անընդունելի է այն պնդումը, որ Թուրքիան փոխել է համակարգը 2017-ին և հաստատվել է միանձնյա ռեժիմ, ուստի 2018թ. ընտրությունները նոր համակարգի առաջին ընտրություններն էին, իսկ 2023թ. երկրորդը»,-ասվում է միջնորդության մեջ։
Փաստաբանը նաև գրել է, որ ընտրական խորհուրդը 2017 թվականի հանրաքվեի ժամանակ վավեր է համարել 2,5 միլիոն չկնքված քվեաթերթիկ։ Քազանը նաև հայտարարում է, որ խորհրդի վերջին որոշմամբ անտեսվել է Սահմանադրության 101/2-րդ հոդվածը, ըստ որի՝ անձը կարող է նախագահ ընտրվել առավելագույնը երկու անգամ։
Հիշեցնենք, որ Թուրքիայում նախագահական ընտրությունները տեղի են ունենալու մայիսի 14-ին։
Էմմա Չոբանյան
