15.07.2026 | 10:40
«88» առևտրային օբյեկտում մեկ օրում արձանագրվել է 33 իրավախախտում
Ադրբեջանցի երկրորդ զինծառայողին ոստիկանությունը փոխանցել է ԱԱԾ-ին
Հասարակություն
14.04.2023 | 13:17
Կապանում հայտնաբերված ադրբեջանցի երկրորդ զինծառայողը փոխանցվել է Ազգային անվտանգության ծառայությանը։ Այս մասին Factor.am-ին հայտնեցին Ոստիկանության լրատվական ծառայությունից։
Հիշեցնենք, որ ապրիլի 10-ին՝ ժամը 01:00-02:00-ն ընկած ժամանակահատվածում, ՀՀ տարածքում հայտնաբերվել և ձերբակալվել էր Ադրբեջանի ԶՈՒ զինծառայող։ Ըստ նրա խոսքի՝ իր հետ եղել էր ևս մեկ զինծառայող։ Նրա որոնողական աշխատանքները շարունակվում էին 3 օր։ Նրան երեկ հայտնաբերել և վնասազերծել են քաղաքացիները։
Առաջինը ձերբակալված զինծառայողն այս պահին կալանավորված է, նրան մեղադրանք է նեկայացվել պետական սահման ապօրինի հատելու և զենքի մաքսանենգության հոդվածներով։ Այս պահին դեռևս հայտնի չէ՝ ձերբակալված երկրորդ զինծառայողին մեղադրանք ներկայացվել է, թե՞ ոչ։
Ըստ շրջանառվող լուրերի՝ այդ երկրորդ զինծառայողը կապ ունի Զանգեզուրի պղնձամոլիբդենային կոմբինատում տեղի ունեցած սպանության հետ, սակայն այս պահի դրությամբ այս մասով որևէ պաշտոնական մեկնաբանություն չի տրվել։
Այս երկրորդ զինծառայողը ՀՀ տարածքում գտնվելու ընթացքում սոցիալական ցանցի իր էջում ուղիղ հեռարձակում է կազմակերպած եղել։ Համացանցում տարածված տեսանյութում նա դիմում է իր հետևորդներին՝ ասելով․ «Հայերի արյուն ենք թափել։ 4-5 հարյուր հայի գլուխ ենք կտրել։ Հիմա էլ ողջ ենք, չենք զոհվել։ Եթե զոհվենք էլ, թող մեր արածը գնահատվի։ Մենք հայրենիքի դավաճաններ չենք»։
Ավելի վաղ Ադրբեջանի ՊՆ-ն հաղորդել էր , որ Նախիջևանի Ինքնավար Հանրապետությունում ադրբեջանական բանակի զինծառայողներ են անհետացել։ Ըստ հաղորդագրության՝ բանակի երկու զինծառայողներ մոլորվել են ոչ բարենպաստ եղանակային պայմանների պատճառով Շահբուզի շրջանի ուղղությամբ։
Արաքս Մամուլյան
