07.09.2026 | 19:00
Աճող գյուղատնտեսություն՝ նվազող բերք․ ինչի մասին են վերջին 10 տարվա թվերը
Ավելի քան 50 թեղի է հատվել Սայաթ-Նովա պողոտայում․ դրանք փոխարինում են սոսիներով․ՏԵՍԱՆՅՈՒԹ
Տնտեսություն
13.04.2023 | 18:24
Սայաթ-Նովա պողոտայում այսօր ավելի քան 50 թեղի է հատվել։ Երևանի քաղաքապետարանի «Կանաչապատում և շրջակա միջավայրի պահպանություն» ՀՈԱԿ-ի տնօրեն Արմեն Բեգոյանը Factor TV-ի հետ զրույցում պնդեց՝ հատվում են կենսունակությունը կորցրած և դեֆորմացված ծառերը։ Թեղիների փոխարեն գնդաձև սոսիներ են տնկվում։
Հիշեցնենք՝ մոտ երեք շաբաթ առաջ մեծ աղմուկ էին բարձրացրել Մոսկովյան փողոցի ծառահատումները․ այստեղ էլ թեղիների փոխարեն տնկվեցին սակուրաներ, որոնք, ըստ որոշ մասնագետների, չեն համապատասխանում երևանյան էկոմիջավայրին, խիտ սաղարթ չունեն և, ի տարբերություն թեղիների, վատ են կլանում փոշին։
Ծառերի փոխարինման համար քաղաքային բյուջեից 150 մլն դրամ է ծախսվել։ Factor TV-ն Արմեն Բեգոյանից հետաքրքրվեց՝ ինչո՞ւ առաջնահերթ չեն համարել արդեն իսկ հատված ծառերի փոխարեն նորերը տնկել, արդյո՞ք ծառերի փոխարինման այս ծրագիրը կապ ունի Երևանի ավագանու առաջիկայում սպասվելիք հերթական ընտրությունների հետ։
«Ինչո՞ւ չեք տեսնում, որ Բաղրամյան պողոտայում կոճղերը հեռացվեցին, և տնկվեցին նոր ծառեր՝ կաղնիներ, Էրեբունի փողոցում հենց այս պահին նախկինում կտրված, դատարկ բնաբաժակները փորվում են և կաղնիներ են տնկվում։ Նախատեսում ենք Ազատության պողոտայում դատարակ սոսիների լրացումներ անել։ Հատված ծառերը տասնյակ հազարներով են, և մեկ տարում մենք չենք կարողանալու բոլոր փողոցներում այդ լրացումներն անել։ Մաշտոցի պողոտայում ծառերի լրացումներ կանենք վերջում։ Սա մեր մեկ տարվա նախապատրաստան աշխատանքների արդյունքն է, մրցույթները հայտարարվել են դեռևս հոկտեմբեր ամսին և նախընտրական քարոզարշավ չէ սա»,- ասաց Արմեն Բեգոյանը։
Չնայած պատասխանատուների վստահեցումներին, որ ամեն ինչ արվում է օրենքի շրջանակում՝ բնապահպանները շարունակում են, պնդել ծառերի փոխարինման ծրագիրը խնդրահարույց է։
Արփի Հակոբյան
