27.06.2026 | 01:34
5.5 մլրդ դոլար. աշխարհի ամենաթանկ ստադիոնում ԱՄՆ-Թուրքիա հանդիպման ետնաբեմը Factor TV-ի թղթակցի աչքերով
Թուրքիայի արդյունաբերությունն ավերիչ երկրաշարժերի հետևանքով ամենամեծ անկումն է գրանցել 2020 թվականից ի վեր
Քաղաքականություն
12.04.2023 | 21:58
Թուրքիայի արդյունաբերական արտադրանքը գրանցել է իր ամենամեծ անկումը 2020թ-ի կորոնավիրուսի համավարակից հետո, մինչդեռ ազդեցիկ գործարարներից մեկը կոչ է անում արժեզրկել լիրան՝ երկրի արտահանման շուկան համաշխարհային մակարդակով մրցունակ պահելու համար, քանի որ ավերիչ երկրաշարժերի ազդեցությունը տարածվում է տնտեսության վրա, գրում է Al Monitor-ը։
Փետրվարի 6-ի ավերիչ երկրաշարժերը Թուրքիայի հարավ-արևելյան 11 նահանգներում ավելի քան 50,000 մարդու կյանք են խլել։ Թուրքիայի կառավարության հաշվարկներով՝ երկրաշարժերի պատճառած վնասը կգերազանցի 100 միլիարդ դոլարը, մինչդեռ աղետի պատճառով հազարավոր ձեռնարկությունների գործունեությունը սառեցվել է։
Ըստ Թուրքիայի վիճակագրական ինստիտուտի հրապարակված տվյալների փետրվարին արտադրությունը նվազել է 8,2%-ով: Վերջին անգամ արդյունահանման ավելի կտրուկ անկում էր գրանցվել 2020 թվականի մայիսին ՝ COVID-19 համաճարակի գագաթնակետին։ Ամենաշատը տուժել է հանքարդյունաբերությունը ՝ նախորդ ամսվա համեմատ նվազելով 18,3 տոկոսով:
Այս շաբաթվա սկզբին հրապարակված տվյալները նույնպես ցույց են տալիս, որ գործազրկությունը փետրվարին աճել է 0,3%-ով՝ հասնելով 10%-ի: 2023 թվականի առաջին երկու ամիսների ընթացքում Թուրքիայի ընթացիկ հաշվի դեֆիցիտը հասել է 18,8 միլիարդ դոլարի:
Լրատվամիջոցը նշում է, որ այս վատ լուրերը գալիս են Թուքիայի նախագահ Ռեջեփ Թայիփ Էրդողանի համար կարևոր ընտրություններից մեկ ամիս առաջ, երբ ընդդիմությունը միավորվում է նրա դեմ։
Թուրք հայտնի գործարարներից մեկն էլ ասել է, որ երկրի արտահանողները «շանս չունեն» մրցակցելու համաշխարհային մրցակիցների դեմ, քանի դեռ լիրան չի թուլացել։ Էգեյան արտահանողների ասոցիացիայի ղեկավար Յակ Էսկինազին , մասնավորապես, Bloomberg-ին ասել է, որ Կենտրոնական բանկի ճնշումները ներառում են արտահանողներից պահանջը ՝ փոխակերպել արտարժույթով ստացված եկամուտները լիրայով և վարկ ստանալու համար բանկերում արտարժույթով ներդնել: Նա նշել է, որ եթե մայիսի 14-ի ընտրություններից հետո այս քաղաքականությունը շարունակվի, «գործարանները կփակվեն»։
Գործարարը նշել է, որ լիրան դոլարի նկատմամբ պետք է արժեզրկվի մոտ 20-25 տոկոսով,որպեսզի թուրքական արտահանումը մրցունակ դառնա։
Էմմա Չոբանյան
