Բադասյանը մանրամասներ է հայտնում Սամվել Ալեքսանյանի ընտանիքի բիզնեսներում իրականացված ստուգումներից․ ՏԵՍԱՆՅՈՒԹ

Եթե մտել ենք «Ալեքս տեքստիլ», ուրեմն կասկած կա, բայց ստուգումներ այլ տեղեր էլ կան։ Այս մասին Կառավարության նիստից հետո լրագրողների հետ զրույցում նշեց ՀՀ ՊԵԿ նախագահ Ռուստամ Բադասյանը՝ անդրադառնալով «Ալեքս տեքստիլ» ընկերության կողմից հարկեր թաքցնելու դեպքերի բացահայտմանը, ինչի հետևանքով հարուցվել է քրեական վարույթ:
«Նույն գործի («Նոր Զովք») մասին է խոսքը, որի շրջանակներում մենք սերվերներ էինք հայտնաբերել, որտեղ տարբեր տնտեսվարող սուբյեկտների թաքցված շրջանառություն կար»,- ասաց ՊԵԿ նախագահը:

Խոսելով այն մասին, որ երբ «Նոր Զովք» սուպերմարկետների ցանցում բացահայտել էին նման դեպք, մեղադրանքներ եղան, թե սա հիմնական մրցակից գործարարի կողմից է կազմակերպված, Բադասյանը շեշտեց. «Իհարկե, այդ ամենը ժպիտ էր առաջացնում, բայց, բնականաբար, մենք որևէ բան չէինք կարող անել, որ այդ սերվերներում հայտնվեին տվյալ գործարարին պատկանող ընկերություններից մեկի շրջանառության վերաբերյալ տեղեկություններ»։
բադասյանի խոսքով՝ բոլոր տնտեսվարողները, անկախ իրենց քաղաքական պատկանելությունից ու հայացքներից, կապերից, պետք է իմանան՝ եթե հայտնաբերվեց ստվերային շրջանառություն, եթե կատարեցին հարկային իրավախախտում, բոլորի նկատմամբ վերաբերմունքը լինելու է նույնը։ Այդ սերվերները կազմակերպվել են հատուկ կապի միջոցով, որպեսզի ոչ մի կերպ վերահսկելի չլինեն:

«Հեշտ չէ հայտնաբերելը, և մենք հսկայական, երկար ամիսների նախապատրաստական աշխատանքներ ենք իրականացրել, որ հասնենք նպատակին։ Ինֆորմացիաներ ունենք շատ տարբեր սուբյեկտների հետ կապված, ոչ միայն առևտրային ցանցերի, բայց ես հիմա չեմ պատրաստվում այդ մասին խոսել»,- նշեց նա:

Տեղեկությունները, թե «Զովք»-ից բացի, նույն հարկային սխեմային են դիմել նաև այլ խոշոր առևտրային կենտրոններ, ՊԵԿ նախագահը չցանկացավ փակագծեր բացել․ «Ինֆորմացիաներ ունենք տարբեր սուբյեկտների հետ կապված։ Մեր մշտական հսկողությունն իրականացվում է, չեմ ուզում հիմա որևէ բացահայտում անել»։

Նշենք, որ վերջերս «Ալեքս տեքստիլ» և «Նոր Զովք» ընկերություններում կատարված խուզարկությունների արդյունքներում հայտնաբերվել էին սերվերային համակարգեր, որոնց միջոցով ընկերությունները կարողացել են թաքցնել շրջանառության վերաբերյալ իրական տվյալները։

Մանրամասները՝ տեսանյութում։