Քաղաքականություն
31.03.2023 | 19:47Ազգային ժողովում միջադեպ է տեղի ունեցել ՔՊ-ական պատգամավոր Վլադիմիր Վարդանյանի և «Հայաստան» խմբակցության պատգամավոր Մհեր Սահակյանի միջև։ ՔՊ խմբակցության ղեկավարն ասել է, թե Մհեր Սահակյանը հարձակվել է ԱԺ պետաիրավական հանձնաժողովի նախագահ Վլադիմիր Վարդանյանի վրա, հարվածել, մարմնական վնասվածքներ հասցրել վերջինիս և փախել:
Ընդդիմությունից Աղվան Վարդանյանն էլ ներկայացրել է, որ ականատեսի վկայությամբ՝ միջադեպը սկսվել է ՔՊ-ական Վլադիմիր Վարդանյանից․ «Նիստի վերջում ինչ-որ լարվածություն է առաջացել, Վլադիմիր Վարդանյանը սկսել է գոռգոռալ, պատգամավոր Մհեր Սահակյանն ասել է՝ «մի՛ գոռացեք», Վարդանյանն ասել է, թե լավ է անում՝ գոռում է։ Վարդանյանը տեղից վեր է կացել, փորձել է քայլ անել դեպի Մհերը, Մհերն էլ մտածել է, որ իր վրա է գալիս խփելու՝ ինքն է խփել, Վարդանյանը վնասվածք է ստացել»։
Ըստ ընդդիմության՝ Վլադիմիր Վարդանյանը մեղք ունի։
Factor TV-ին տված հարցազրույցում ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանը պատմեց, թե վիճել են պատգամավորներ Վլադիմիր Վարդանյանը և Մհեր Սահակյանը, որի արդյունքում Մհեր Սահակյանը հարվածել է Վարդանյանի քունքին, ապա թաքնվել է զուգարանում, սակայն ոստիկանությունը ձերբակալել է։
«Մարդիկ զբաղվել են օրենսդրական գործունեությամբ, տհաճ միջադեպ է տեղի ունեցել, որի մեղավորը, հրահրիչը Մհեր Սահակյանն է եղել, իրավապահները գնահատական կտան: ԱԺ-ի ծեծկռտուքի դեպքերից, հայհոյանքներից ողբերգություն մի սարքեք, նորմալ է։ Այս ամենի արդյունքում, որպես պետություն, դժվար, բայց քայլում ենք ականապատ դաշտում»,- ասաց Հովիկ Աղազարյանը։
Հարցազրույցն ամբողջությամբ՝ տեսանյութում։
Ռոբերտ Անանյան
