Բանակին տրված միլիոններն ինչո՞ւ դիրքեր չեն հասնում․ թող ԱԱԾ հրավիրեն ինձ, կոռուպցիայի տեղերը կասեմ․ Կարին Տոնոյան․ ՏԵՍԱՆՅՈՒԹ

Հանրային գործիչ Կարին Տոնոյանը Հայաստանի Մարդու իրավունքների պաշտպանի պաշտոնում Էդգար Ղազարյանի թեկնածությանը կողմ է, ասում է, որ «նա oմբուդսմենի վատ թեկնածու չէ, քանի որ լավագույն աշխատողներից էր նախկին իշխանությունների շրջանում»։

Սակայն նա, կարծես, չի կիսում Էդգար Ղազարյանի լավատեսությունը, երբ նա իր ընտրվելու շանսերը 100 տոկոսին մոտ է գնահատել՝ հիմնավորելով, որ Ազգային ժողովի գոյություն ունեցող երեք խմբակցություններից երկուսն առաջադրել են իր թեկնածությունը։ Հանրային գործիչը հիշեցրեց, որ կա նաև «Քաղաքացիական պայմանագիր» խմբակցություն, որի ձեռքում է կենտրոնացած ԱԺ-ի մեծամասնությունը։

Կարին Տոնոյանը Factor TV-ին տված հարցազրույցում հերքեց նաև ԱԺ-ի ընդդիմադիրների կողմից իրեն ուղղված քննադատությունները, թե նա է ամիսներ առաջ ԱԺ շենքի մոտ տապալել հակաիշխանական հռետորաբանությամբ հանրահավաքը․ «Եթե ես տապալեցի ընդդիմության հանրահավաքը, ուրեմն՝ ես կարգին առաջնորդ եմ։ Այդ իրենք զայրույթն այլ ուղիով տարան»։

Ընդդիմադիր գործիչը քննադատեց ԱԺ-ի ընդդիմությանը, որ ունենալով իշխանափոխության համար անհրաժեշտ ռեսուրսներ՝ չեն կիրառում դրանք, ինչի հետևում նա իշխանության հետ գործակցության հետք է տեսնում։ Կարին Տոնոյանը, որ, ինչպես ինքն է հավաստիացնում, հաճախ է լինում հայ-ադրբեջանական սահմանագոտու մարտական դիրքերում, անբավարար է գնահատում իրավիճակը առաջնագծում․ «Պատերազմից հետո բանակից հեռացան բարոյական, նորմալ սպաները, իհարկե՝ որոշները դիմանում են դեռ։ Մարդուն արժանապատիվ աշխատելու տեղ չեն թողնում, հարկադրանքներ են՝ ծածկել, փակել»։

Կարին Տոնոյանը նաև կոռուպցիոն երևույթների մասին գիտի, և հրավիրում է ԱԱԾ-ի ուշադրությունը․ «Դիրքերում խայտառակ վիճակ է՝ Վարդենիսից մինչև Սյունիք անձրևների հետևանքներով տնակներում կաթում է, ցեխի մեջ են տղերքը, ինչո՞ւ միլիոնները տեղ չեն հասնում։ Թող ինձ հրավիրեն ԱԱԾ, ով կասի՝ բանակում կոռուպցիա չկա, կանչեք՝ ես կասեմ տեղերը կոռուպցիայի։ Բանակին տրված գումարներն ինչո՞ւ դիրքեր չեն հասնում»։

Հարցազրույցն ամբողջությամբ՝ տեսանյութում։

Ռոբերտ Անանյան