Փաստաբան Լևոն Գևորգյանին մեղադրանք է ներկայացվել

Հակակոռուպցիոն կոմիտեում նախաձեռնված վարույթի շրջանակներում փաստաբան Լևոն Գևորգյանին մեղադրանք է ներկայացվել։ Այս մասին Factor.am-ի հարցին ի պատասխան ասաց Հակակոռուպցիոն կոմիտեի մամուլի խոսնակ Մարինա Օհանջանյանը՝ նշելով, որ  մեղադրանքը Քրեական օրենսգրքի 436-րդ հոդվածի 2-րդ մասի 3-րդ կետով (կաշառք տալը):

Ըստ վարույթի նյութերի՝ փաստաբանը 40 հզ դրամ կաշառք է առաջարկել պարեկին, սակայն վերջինս այն չի վերցրել։ Ենթադրյալ կաշառքը չվերցնելու հանգամանքը, սակայն, նշանակություն չունի արարքը կաշառք տալու հոդվածով որակելու համար։

Քրեական օրենսգրքի 436-րդ հոդվածում կաշառք տալը՝  մեկնաբանվում է որպես պաշտոնատար անձին կամ նրա մատնանշած անձին անձամբ կամ միջնորդի միջոցով գույք, ներառյալ դրամական միջոց, արժեթուղթ, վճարային այլ գործիք, գույքի նկատմամբ իրավունք, ծառայություն կամ որևէ այլ առավելություն խոստանալը, առաջարկելը կամ տրամադրելը՝ պաշտոնատար անձի իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով կաշառք տվողի կամ նրա մատնանշած անձի օգտին գործողություն կատարելու կամ չկատարելու համար։

Հիշեցնենք, որ մարտի 22-ին Ոստիկանությունը հայտնել է այն մասին, որ  Պարեկային ծառայության աշխատակիցները Հրազդանի կիրճում ստուգում կատարելու նպատակով կանգնեցրել են «Տոյոտա» մակնիշի ավտոմեքենա, որի վարորդն իր մոտ չի ունեցել վարորդական իրավունքի վկայական, ինչի համար ուղևորը 40.000 դրամ է առաջարկել պարեկային ծառայողներին: Դրանից հետո մամուլը գրեց այն մասին, որ ուղևորը եղել է փաստաբան Լևոն Գևորգյանն, ով միջազգային իրավունքի փորձագետ է, իրավաբանական գիտությունների թեկնածու։

Լևոն Գևորգյանի հետ կապ հաստատել մեզ չի հաջողվել, ուստի մեղադրանքի և դեպքի հետ կապված  վերջինիս դիրքորոշումը մեզ հայտնի չէ։

Արաքս Մամուլյան