ԱՄՆ Պետդեպի ներկայացուցիչը՝ Արցախում ՄԱԿ-ի խաղաղապահներ տեղակայելու մասին

ԱՄՆ Պետքարտուղարությունը ջանքեր է գործադրում Լեռնային Ղարաբաղի հակամարտության գոտում ականազերծման խնդիրների լուծման համար։ Այս մասին ադրբեջանական Թուրան գործակալությանն ասել է  Պետքարտուղարության քաղաքական-ռազմական հարցերի բյուրոյի քարտուղար Ջեսիկա Լյուիսը Վաշինգտոնում անվտանգության հարցերի շուրջ ճեպազրույցում։

«Մենք խորապես մտահոգված ենք ականների և չպայթած զինամթերքի առնչությամբ, որոնք շարունակում են սպանել և խեղել խաղաղ բնակիչներին, արգելափակել տնտեսական զարգացումը և կանխել տեղահանվածների անվտանգ վերադարձը»,- ասել է նա։

Պատասխանելով Արցախում խաղաղության վերականգնման գործում Վաշինգտոնի դերի մասին Թուրանի հարցին՝ նա վերահաստատել է դիրքորոշումը, որ Միացյալ Նահանգները հավատարիմ է խաղաղ, ժողովրդավարական և բարգավաճ Հարավային Կովկասի զարգացմանը, և ընդունում են, որ «հակամարտությունը ռազմական լուծում չի կարող ունենալ, և որ վեճերը լուծելու համար ուժի կիրառումն անընդունելի է»։

Նա կրկնել է պետքարտուղար Էնթոնի Բլինքենի խոսքերը, որ «Հայաստանի և Ադրբեջանի միջև ուղիղ երկխոսությունը հիմնախնդիրների լուծման և կայուն խաղաղության հասնելու բանալին է»:

Խոսելով բյուրոյի ջանքերի մասին՝ Լյուիսը հիշեցրել է, որ 2022 թվականին ԱՄՆ-ն 2 մլն դոլար է հատկացրել Լեռնային Ղարաբաղում պատերազմական գոտում ականազերծման համար։ Նույն նպատակների համար 2021-ին հատկացվել է 500,000 դոլար։

Տարածաշրջանում խաղաղապահ գործողություններին մասնակցելու՝ Վաշինգտոնի շահագրգռվածության վերաբերյալ հարցին ի պատասխան՝ Լյուիսը նշել է, որ բյուրոն զբաղվում է նման առաքելությունների համար խաղաղապահների պատրաստմամբ։

«Կարծում եմ, որ մենք պետք է ուշադրությամբ դիտարկենք դրա հնարավորությունը։ Ակնհայտ է, որ այդ գործընթացն ընթանում է ՄԱԿ-ի միջոցով, և ես ձեռնպահ կմնամ մեկնաբանություններից, թե ինչպես է ՄԱԿ-ը կառավարելու այդ գործընթացներն ապագայում։ Սակայն ես կարծում եմ, որ մեզ պետք է դիտարկել  այդ գործընթացին ոչ միայն Ռուսաստանի կողմից աջակցությունը։ Ռուսական տեխնիկան այժմ դժվարություններ ունի, օրինակ՝ պահեստամասեր ստանալու հարցում, և դա կարող է ազդել խաղաղապահների՝ իրենց գործունեությունն իրականացնելու ունակության վրա»,- ասել է Պետքարտուղարության պաշտոնյան։

Էմմա Չոբանյան