«Վստրեչի» կամրջով երթևեկը կսահմանափակվի․ Պապիկյանն այցելել է Նախիջևանի սահման․ Լուրեր

• ՌԴ ԱԳՆ խոսնակ Մարիա Զախարովան հայտարարել է, որ մշակվում է Հայաստանում ՀԱՊԿ առաքելության տեղակայման հարցը։ Նրա խոսքով՝ այդ մասին բանակցությունները անցկացվել են Ռուսաստանի ԱԳ նախարար Սերգեյ Լավրովի՝ Հայաստան այցի ժամանակ։ Նա նաև ասել է, թե Լեռնային Ղարաբաղում նոր միջազգային առաքելության տեղակայման համար անհրաժեշտ է ինչպես Հայաստանի, այնպես էլ Ադրբեջանի համաձայնությունը, ինչը ՌԴ-ն չի տեսնում։
• Զախարովան պատասխանել է նաև Ադրբեջանի զինուժի կրակոցների հետևանքով Հայաստանում Ռուսաստանի ՊՆ զինծառայողների վիրավորման մասին հարցին։ Նա ասել է, թե իրենց պաշտպանության նախարարությունը պարզում է միջադեպի հանգամանքները, և դրանից հետո իրենք գնահատական կտան։
• Պաշտպանության նախարար Սուրեն Պապիկյանը այցելել է հարավարևելյան սահմանագոտի՝ Նախիջևանի հետ սահման, հետևել մարտական հերթապահության ընթացքին, զրուցել դիրքապահների հետ։ նախարարը հատուկ ուշադրություն է դարձրել դիրքերի ինժեներական կառույցների հագեցվածությանը, կացարանային պայմաններին։
• Մինչև հունիսի 1-ը ամբողջությամբ փակ է լինելու Երևանի Արշակունյաց պողոտա-Գարեգին Նժդեհ փողոցի խաչմերուկից՝ Հայրենիքի հրապարակից դեպի Արցախի պողոտա-Ռոստովյան փողոցի խաչմերուկ ուղղությունը՝ ներառյալ «Վստեչի մոստ» անունով հայտնի կամուրջը: Քաղաքապետարանից հայտնել են, որ տվյալ ուղղության երթևեկությունն իրականացվելու է մեկ երթևեկելի գոտիով՝ հանդիպակաց ուղղության հաշվին: Հաջորդ փուլում նույն մոտեցումը կկիրառվի հետադարձ ուղղությամբ:

Այս ժամի լուրերը՝ տեսանյութում։