15.08.2026 | 21:02
Վահան Կոստանյանը Զելենսկիին է փոխանցել ՀՀ բարձրագույն ղեկավարության շնորհավորանքները
Պատերազմի սկզբից ի վեր ռուսական դատարանները 247 դատավճիռ են կայացրել դասալքության և հրամաններին չենթարկվելու գործերով
Քաղաքականություն
22.03.2023 | 23:06
Ուկրաինա ռուսական զորքերի լայնամասշտաբ ներխուժման սկզբից ի վեր Ռուսաստանում կայազորային զինվորական դատարանները դատավճիռ են կայացրել 247 գործով՝ զորամասն ինքնակամ լքման, դասալքության և հրամաններ չկատարելու համար։ Այս մասին հայտնում է Mediazona-ն՝ ուսումնասիրելով դատական վիճակագրությունը, գրում է Meduza-ն։
Հրապարակման պահին կայազորային դատարաններն այս հոդվածներով ստացել են 536 գործ, որոնցից 289-ով դեռևս դատավճիռ չի կայացվել։ Ամենատարածված մեղադրանքը զորամասն ինքնակամ լքելն է. այդպիսի 471 գործ կա։
Զինվորականների դեմ գործերը սկսել են աճել 2022 թվականի ամռանը, սակայն դրանց մեծ մասը հարուցվել է սեպտեմբերին Ռուսաստանում մոբիլիզացիա հայտարարվելուց հետո։
Նշվում է, որ ամեն ամիս նման գործերի թիվն աճում է։ Հաղորդվում է, որ զորամասն անօրինական լքելու հոդվածով հայտնի դեպքերի մեկ երրորդից ավելին ավարտվել է պայմանական պատժաչափով, ինչը հնարավորություն է տալիս դատապարտյալներին հետ ուղարկել մարտական գործողությունների գոտի։
Զորամասն ինքնակամ լքելու դեպքերում զինվորները միշտ չէ, որ բացահայտ խոստովանում են, որ փախել են, քանի որ չեն ցանկանում պատերազմին մասնակցել։ Ռազմաճակատ ուղարկելու կամ մարտական գործողություններին մասնակցելու հրամանը կատարելուց ուղղակիորեն հրաժարվելու դեպքում գործեր են հարուցվում Քրեական օրենսգրքի 322-րդ հոդվածով։ Հրապարակման պահին նման 25 դեպք է եղել, որոնցից 7-ը հասել են դատավճռի։
Եթե հրաժարումը ՌԴ տարածքում է, ապա նախատեսված ազատազրկման ժամկետն ավելի քիչ է, քան այլ զինվորական հոդվածներով՝ 2-3 տարվա ազատազրկում։ Եթե զինվորականը հրաժարվում է հրամանը կատարել մարտական գործողությունների գոտում, ապա մեծանում է «ծառայության շահերին էական վնաս հասցնելու» կամ «լուրջ հետևանքների» վերագրման հավանականությունը, որն արդեն որակվում է 322 հոդվածի այլ մասով, որը նախատեսում է մինչև 10 տարի ժամկետով ազատազրկում։
Էմմա Չոբանյան
