14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Հակամարտության կարգավորումը ներառում է նաև Լեռնային Ղարաբաղի ժողովրդի իրավունքներն ու անվտանգությունը․ Շոլցը՝ Ալիևին
Քաղաքականություն
15.03.2023 | 11:39
Գերմանիայի կանցլեր Օլաֆ Շոլցը նախօրեին Ադրբեջանի նախագահ Իլհամ Ալիևի հետ մամուլի ասուլիսում անդրադարձել է նաև Լեռնային Ղարաբաղում տիրող իրավիճակին, քննարկվել է նաև Ռուսաստանի ներխուժումն Ուկրաինա և դրա ազդեցությունը Ադրբեջանի և Հարավային Կովկասի տարածաշրջանի վրա։
«Ես հստակ հայտնել եմ մեր դիրքորոշումը՝ ռուսական ագրեսիվ պատերազմը միջազգային իրավունքի բացահայտ խախտում է»- ասել է Շոլցը՝ հավելելով․ «Համաձայնություն կա, որ Հայաստանի և Ադրբեջանի միջև երկարամյա հակամարտության խաղաղ կարգավորմանն ուղղված ջանքերը առանցքային նշանակություն ունեն, հատկապես Ուկրաինայի դեմ ռուսական պատերազմի ֆոնին»։
Կանցլեր Շոլցի խոսքով՝ Գերմանիան անհանգստացած է հայ-ադրբեջանական սահմանին անկայուն իրավիճակով։
«Իրավիճակը երկարաժամկետ հեռանկարում անկայուն է և պարունակում է հետագա էսկալացիաների վտանգ։ Անցած մի քանի շաբաթների և ամիսների իրադարձությունները կրկին ու կրկին ցույց են տվել դա»,-ասել է նա՝ նշելով, որ հատկապես Լեռնային Ղարաբաղում հումանիտար իրավիճակը գնալով ավելի ու ավելի է ճգնաժամային դառնում։
«Հետևաբար, մեր ընդհանուր նպատակը պետք է լինի այս հակամարտության արագ և կենսունակ լուծում գտնելը՝ ի շահ տեղի բնակչության», – ասել է Շոլցը: Կանցլերն ընդգծել է, որ հակամարտության խաղաղ կարգավորումը պետք է հիմնված լինի Հայաստանի և Ադրբեջանի տարածքային ամբողջականության սկզբունքի վրա։
«Այն ներառում է նաև Ղարաբաղի ժողովրդի իրավունքների և անվտանգության հարգումը։ Կարևոր է ապահովել, որ երկու պետությունների բոլոր բնակիչների մարդու և փոքրամասնությունների իրավունքները հարգվեն միջազգային չափանիշներին և ստանձնած պարտավորություններին համապատասխան»,-ասել է Գերմանիայի կանցլերը։
Էմմա Չոբանյան
