Մանրամասներ Սյունիքում ավտոբուսի վթարից․ խուզարկվել է Երևանի փոխքաղաքապետի աշխատասենյակը․ Լուրեր

• Հակակոռուպցիոն կոմիտեն այսօր խուզարկություն է իրականացրել Երևանի քաղաքապետի տեղակալ Գևորգ Սիմոնյանի աշխատասենյակում։ Ըստ կառույցի՝ Սիմոնյանի աշխատասենյակում խուզարկությունը կապված է կորոնավիրուսային վարակի դեմ պայքարի համար ծախսերում ենթադրյալ չարաշահումներին, որոնց վերաբերյալ ուսումնասիրությունն իրականացրել է Հաշվեքննիչ պալատը։  Սիմոնյանը եղել է առողջապահության նախարարի տեղակալ, երբ նախարարությունը ղեկավարում էր Արսեն Թորոսյանը։ Կոմիտեից փոխանցեցին, որ Սիմոնյանը գործով դեռ որևէ կարգավիճակ չունի։
• Արցախի Ասկերանի շրջանի Իվանյան համայնքի վարչական տարածքում կառուցվող 107 առանձնատների շինարարությունը, շրջափակմամբ պայմանավորված, գրեթե դադարեցված է։ Հայտնում է Արցախի կառավարության տեղեկագիրը: Առանձնատների մեծ մասի շինարարությունն ավարտման փուլում է, բայց շինանյութի պակասի պատճառով այս պահի դրությամբ աշխատանքները, ինչպես նաև արտաքին ենթակառուցվածքների կառուցումը, գրեթե չեն իրականացվում։
• 1 մարդ մահացել է, 24 մարդ հոսպիտալացված է Սյունիքում երեխաների տեղափոխող ավտոբուսի մասնակցությամբ ավտովթարի հետևանքով։ Կապան-Նորաշենիկ ավտոճանապարհին Օխտար գյուղի միջնակարգ դպրոցի աշակերտներին և անձնակազմին տեղափոխող «PAZ» ավտոբուսը դուրս է եկել ավտոճանապարհի եթևեկելի հատվածից և կամրջից (մոտ 5 մ բարձրություն) ընկել Աճանան գետը: 25 տուժած (ավտոբուսի վարորդը, դպրոցի 9 աշխատակից և 15 աշակերտ) հոսպիտալացվել է Կապանի ԲԿ, որտեղ արձանագրվել է ուսուցիչ Թ․ Դ․-ի (ծնված 1970 թ․) մահը։ Տուժածներից 3-ի առողջական վիճակը գնահատվում է ծանր, մյուսներինը` բավարար:

Այս ժամի լուրերը՝ տեսանյութում։