Քաղաքականություն
03.03.2023 | 19:13
Միացյալ Թագավորության կառավարությունը խորապես մտահոգված է Լաչինի միջանցքի գործունեության շարունակական խափանումներով, մասնավորապես՝ ապրանքների և մարդկանց հոսքի։ Այս մասին հայտարարել է ԵԱՀԿ-ում ՄԹ դեսպան Նեիլ Բուշը։
«Այս հարցը շարունակում է մնալ միջազգային օրակարգի առաջին տեղում։ Մենք բազմիցս քննարկել ենք խափանումն այստեղ՝ Վիեննայում, ինչպես նաև ՄԱԿ-ի Անվտանգության խորհրդում: Այն, որ հարցն այժմ ներկայացվել է Արդարադատության միջազգային դատարան և կայացվել է վճիռ, ամրապնդում է հրատապ քայլեր ձեռնարկելու անհրաժեշտությունը: Լաչինի միջանցքի ներկայիս խափանումը վնասում է խաղաղության և կայունության ապահովման ջանքերին։ Միացյալ Թագավորության կառավարությունն ի գիտություն է ընդունել Դատարանի բոլոր վճիռները և կոչ է անում անհապաղ միջոցներ ձեռնարկել՝ վերականգնելու ապրանքների և մարդկանց հոսքը Լեռնային Ղարաբաղ»,- ասվում է հայտարարության մեջ։
Դիվանագետը նշել է, որ կողմերը պետք է առանց նախապայմանների մասնակցեն առարկայական բանակցությունների՝ ապահովելու հակամարտության կայուն և խաղաղ կարգավորումն ու կարգավորելու առկա լարվածությունը։
Էմմա Չոբանյան
