Հայաստանում ԵՄ գրասենյակը հայտնել է Եղեգնաձորում առաքելության կենտրոնակայանի գործարկման մասին

ԵՄ քաղաքացիական գործողությունների հրամանատար Ստեֆանո Տոմատը 2023 թվականի փետրվարի 20-ին և 21-ին այցելել է Հայաստան՝ Եղեգնաձորում ԵՄ առաքելության գրասենյակը բացելու նպատակով: Այս մասին ասված է ԵՄ պաշտոնական կայքում հրապարակված հաղորդագրությունում։

Բացման արարողությունը համընկել է փետրվարի 20-ին ԵՄ Արտաքին հարաբերությունների խորհրդի կողմից ՀՀ-ում ԵՄ առաքելության (EUMA) գործարկման մասին Խորհրդի որոշման ընդունմանը:

Տոմատը հանդիպումներ է ունեցել վարչապետ Փաշինյանի, ԱԳ նախարար Միրզոյանի և նրա տեղակալի, Ազգային անվտանգության խորհրդի քարտուղարի, ինչպես նաև ԱԱԾ պետի և սահմանապահ զորքերի հրամանատարի հետ։ ԵՄ Քաղաքացիական գործողությունների հրամանատարին բոլոր հանդիպումներին ուղեկցել են EUMA-ի նորանշանակ առաքելության ղեկավար Մարկուս Ռիտերը և Հայաստանում ԵՄ պատվիրակության ղեկավարի պաշտոնակատար Յան Պլեշինգերը:

Տոմատը բացել է EUMA-ի գլխամասային գրասենյակը՝ հայտարարելով, որ EUMA-ն հասել է նախնական օպերատիվ կարողություններին (մոտ 50 աշխատակիցներ ներկայում տեղակայված են EUMA-ում), ինչը թույլ է տալիս առաքելությանը սկսել գործունեությունը:

Երդմնակալության արարողությունը տեղի է ունեցել առաքելության 6 առաջապահ օպերատիվ բազաների ղեկավարների ներկայությամբ։

Ստեֆանո Տոմատը շեշտել է ԵՄ-ի և ՀՀ-ի միջև գործընկերության ոգին, որն ամրապնդվել է EUMA-ի գործարկումով: Նա, միաժամանակ, ընդգծել է, որ առաքելությունը քաղաքական գործընթացին աջակցելու գործիք է, որը պետք է առաջ տանեն առաջին հերթին երկու կողմերը՝ Հայաստանը և Ադրբեջանը։

Տաթև Ֆռանգյան