12.03.2026 | 21:16
Հայաստանի և Շվեյցարիայի ԱԳ նախարարները մտքեր են փոխանակել Մերձավոր Արևելքում զարգացումների շուրջ
Ինքնորոշման իրավունքը եթե լիներ, ցանկացած մեխանիզմ կաշխատեր. Արծվիկ Մինասյան․ ՏԵՍԱՆՅՈՒԹ
Քաղաքականություն
02.03.2023 | 11:31
Չի կարող ստեղծվել միջազգային մեխանիզմ, որի շուրջ Բաքուն և Ստեփանակերտը որպես իրավահավասար կողմեր կարող են բանակցել։ Ազգային ժողովում լրագրողների հետ ճեպազրույցում այս մասին ասաց «Հայաստան» խմբակցության քարտուղար Արծվիկ Մինասյանը՝ անդրադառնալով դիտարկմանը, որ պաշտոնական Երևանը կարևորում է միջազգային տեսանելի մեխանիզմի ստեղծումը, որի շրջանակում Ստեփանակերտն ու Բաքուն պետք է երկխոսեն։
«Ակնհայտ է, որ օրվա քաղաքական իշխանությունը միջազգային մեխանիզմները կիրառում է, որպեսզի խուսափի արցախյան հարցով Հայաստանի պատասխանատվությունից, ինչն անընդունելի և մերժելի վարքագիծ է»,-նշեց Մինասյանը։
Մինասյանը նկատեց, որ Արցախի ներգրավվածությունը բանակցություններում նախատեսված էր հենց ԵԱՀԿ Մինսկի համանախագահության ձևաչափում, որը կառաջադրեին եռանախագահ երկրները և միջազգային հանրությունը խնդրի կարգավորման ինչ–որ մի փուլում։
«Բոլոր այն հայտարարությունները, թե իբր Արցախի ներկայացուցիչների հետ լավ է, որ նստեն, խոսեն և այլն, ձախողման է դատապարտված։ Եթե ի սկզբանե Ադրբեջանն արձանագրում է, որ չկա այդպիսի միավոր, և արցախահայությանը դիտում է որպես Ադրբեջանի հասարակության կամ քաղաքացիների մի մաս, նշանակում է՝ ձախողված Է մեր պատկերացումներին համապատասխան որևէ միջազգային մեխանիզմի գործադրում»,- նշեց Մինասյանը` հավելելով` ինչ էլ առաջարկեն, դա ժամանակավոր կամ դանդաղ մահվան գնացող գործողություն է։
Պատգամավորի խոսքով` իշխանության վարքագծում բացակայում է Արցախի ինքնորոշման իրավունքի սկզբունքը, ինչը հակասում է հենց իրենց ներկայացրած նախընտրական և կառավարության ծրագրի դրույթներին` «Անջատում հանուն փրկության», կամ «Ճանաչում հանուն փրկության»։
Մանրամասները՝ տեսանյութում։
