Վտանգը մեծ է․ Լավրովը ՀՀ տարածքը վիճելի է համարում, որ Ադրբեջանին տա․ կո՛շտ խոսիր, իշխանություն․ Ստեփան Գրիգորյան․ ՏԵՍԱՆՅՈՒԹ

Ադրբեջանի և Լեռնային Ղարաբաղի պետական կառույցների անդամների այսօրվա հանդիպումը քաղաքագետ Ստեփան Գրիգորյանը համարում է Հայաստանի դիվանագիտական հաղթանակը։

«Դա լրջագույն հաջողությունն է Հայաստանի դիվանագիտության։ Դուք հիշում եք, որ ՌԴ-ն և Ադրբեջանն ուզում էին մեր վզին զիջումներ փաթաթեին, ասում էին՝ «Զանգեզուրի միջանցք» տվեք, կբացենք Լաչինի միջանցքը։ Դա խորամանկություն է դիվանագիտական, որը ոչ թե Ադրբեջանից էր գալիս, այլ Ռուսաստանի ուժեղ դիվանագիտությունից։ Նրանք ամեն ինչ խառնում են իրար և զիջումներ պահանջում, մինչդեռ ՀՀ-ն ասաց՝ մենք կապ չունենք Լաչինի միջանցքի հետ։ Պաշտոնապես ֆիքսվեց Լեռնային Ղարաբաղի սուբյեկտայնությունը։ Ալիևը երկու տարի ասում էր՝ չկա Ղարաբաղի հարց, բայց հիմա իր պաշտոնյաներին ուղարկում է, որ Լեռնային Ղարաբաղի լիազոր ներկայացուցիչների հետ հանդիպի»,- ասաց քաղաքագետը։

Ռուբեն Վարդանյանի հեռացումից և Սերգեյ Լավրովի՝ Բաքու այցից հետո այսօր Լեռնային Ղարաբաղի ու Ադրբեջանի ներկայացուցիչների երկրորդ հանդիպումն է տեղի ունեցել, այս անգամ Խոջալուում՝ ռուսական հրամանատարության միջնորդությամբ։ Հանդիպմանը քննարկվել են «Լաչինի միջանցքով մեքենաների անխոչընդոտ անցումը վերականգնելու և միջանցքի նպատակային օգտագործման փաստը հաստատելու հարցը», նաև՝ էլեկտրամատակարարման և գազի անխափան մատակարարման հարցերը։

Ըստ ԼՂ-ի իշխանության՝ հանդիպմանը քննարկվել է Դրմբոնի և Կաշենի հանքավայրերում ադրբեջանական կողմի ներկայացուցիչների կողմից շրջակա միջավայրի մոնիթորինգի հնարավորությունը․ «Պայմանավորվածություններ են ձեռք բերվել հետագա համագործակցության վերաբերյալ՝ լարվածության նվազեցման և տարածաշրջանում խաղաղ կյանքի հաստատման ուղղությամբ»։

Հարցազրույցն ամբողջությամբ՝ տեսանյութում։

Ռոբերտ Անանյան