27.06.2026 | 06:03
ԱԱ-2026. Իսպանիան հաղթեց Ուրուգվային, Կաբո Վերդեն նույնպես դուրս եկավ փլեյ-օֆֆ. ՏԵՍԱՆՅՈՒԹ
ՌԴ-ի եկամուտները նավթի և գազի արտահանումից հունվարին կրճատվել են գրեթե 40 տոկոսով
Քաղաքականություն
01.03.2023 | 15:19
2023 թվականի հունվարին նավթի և գազի արտահանումից Ռուսաստանի եկամուտները, նախորդ տարվա նույն ժամանակահատվածի համեմատ, կրճատվել են 38 տոկոսով։ Այս մասին հայտնում է Reuters-ը՝ վկայակոչելով Միջազգային էներգետիկ գործակալության (IEA) տվյալները, փոխանցում է Meduza-ն։
Այս տարվա հունվարին Մոսկվան, ըստ IEA-ի, նավթի և գազի արտահանումից ստացել է 18,5 մլրդ դոլար, անցյալ տարվա հունվարին՝ մոտ 30 մլրդ դոլար։
Գործակալության գործադիր տնօրեն Ֆաթիհ Բիրոլը հայտարարել է, որ արևմտյան պատժամիջոցները ռուսական էներգակիրների նկատմամբ հասել են իրենց նպատակին՝ կայունացրել են շուկան և կրճատել Մոսկվայի եկամուտները։
«Մենք ակնկալում ենք, որ Ռուսաստանի նավթի և գազի եկամուտների նվազումն ավելի կտրուկ կլինի առաջիկա ամիսներին: Եվ նույնիսկ ավելի դրամատիկ միջնաժամկետ հեռանկարում՝ տեխնոլոգիաների և ներդրումների հասանելիության բացակայության պատճառով»,- ասել է Բիրոլը:
Ավելի վաղ էլ Ռուսաստանի Ֆինանսների նախարարությունը հայտնել էր, որ նախնական տվյալներով՝ 2023 թվականի հունվարին ռուսական բյուջեի դեֆիցիտը, նախորդ տարվա հունվարի համեմատ, աճել է 14 անգամ և կազմել 1,8 տրիլիոն ռուբլի։ Նավթագային եկամուտներն էլ նվազել են 46 տոկոսով, ինչը, ըստ Ֆինանսների նախարարության, պայմանավորված է Urals նավթի գների իջեցմամբ և գազի արտահանման կրճատմամբ։
Էմմա Չոբանյան
