22.02.2026 | 15:13
Հունգարիան կբլոկավորի Ռուսաստանի դեմ պատժամիջոցների 20-րդ փաթեթը․ ԱԳ նախարար
Նկարիչների միությունում կրքերը թեժ են․ նախագահ Կարեն Աղամյանը հրաժարական կտա՞․ ՏԵՍԱՆՅՈՒԹ
Մշակույթ
19.06.2018 | 19:08
Այսօր Նկարիչների միությունում կրկին բողոքի ակցիա էր՝ ընդդեմ միությունում տիրող բարքերի։ Ակցիայի մասնակից նկարիչները նշում էին, որ միությունը վաղուց սպառված և արժեզրկված կառույց է, այն տարիների ընթացքում կորցրել է տարածքներ, գեղարվեստի կոմբինատներ։ Ակցիայի մասնակիցները պահանջում էին 20 տարի միության նախագահությունը ստանձնած նախագահ Կարեն Աղամյանի հրաժարականը։ Նրանք հարցնում էին՝ ո՞ր օրենքով է Աղամյանը անընդմեջ ընտրվել միության նախագահ։
Նկարիչները պահանջում էին նաև միության ներսում ֆինանսական հոսքերի բացահայտում, միության կազմի փոփոխություն, կառավարման նոր որակ։ Ակցիայի մասնակիցների խոսքով՝ իրենք որևէ մեկին պախարակելու կամ քարկոծելու մտադրություն չունեն, պարզապես ցանկանում են վերականգնել միության երբեմնի վարկը։
Նկարիչները շեշտեցին, որ այսօր միության անդամ լինելն իրենց պատիվ չի բերում, այնինչ խորհրդային տարիներին մարդիկ հպարտանում էին դրանով։
Հիշեցնենք, որ օրեր առաջ ևս միությունում նկարիչները բողոքի ակցիա էին իրականացրել, սակայն այն ժամանակ նախագահը երկրում չէր։ Այս անգամ պարոն Աղամյանը Հայաստանում էր և սկզբում պատասխանեց լրագրողների ու նկարիչների հարցերին։ Նա նշեց, որ մեր երկիրն այսօր գնում է կտրուկ փոփոխությունների, սակայն այս ալիքի ներքո ոմանց մոտ բարի մղումներից զատ արթնացել են նաև չար մղումները։
Պարոն Աղամյանի հասցեին հնչեցին մեղադրանքներ առ այն, որ նա երկու տարին մեկ անգամ գույքային և ֆինանսական հաշվետվություն չի ներկայացրել, այնինչ դա սահմանված է կանոնադրությամբ։ Միության նախագահն էլ պատասխանեց, որ հաշվետվություններն, ըստ կանոնադրության, ներկայացվում են համագումարի ժամանակ։ Նրա խոսքով՝ վերջին համագումարին հաշվետվություն եղել է, հաջորդին ևս կլինի։ Ինչ վերաբերում է միության կանոնադրությունը փոխելու պահանջներին, պարոն Աղամյանը տեղեկացրեց, որ դա իր լիազորությունների մեջ չի մտնում։ Փոխարենը իրեն են ստիպել 4-5 անգամ փոխել կանոնադրությունը։
Ավելի ուշ ակցիայի մասնակիցները պարոն Աղամյանին հրավիրեցին դահլիճ՝ լսելու իրենց փաստարկները։ Թեժ բանավեճ ծավալվեց հատկապես օրենսդրական հարցերի շուրջ։
Մանրամասները՝ տեսանյութում։
Աննա Բաբաջանյան
