Կրեմլի գաղտնի ռազմավարությունը նկարագրում է Բելառուսի գրավումը. փաստաթուղթը հայտնվել է ԶԼՄ-ների տրամադրության տակ

Լրագրողներին հասանելի է դարձել Ռուսաստանի իշխանությունների ներքին շրջանառության գաղտնի փաստաթուղթը, որը կոչվում է «Ռուսաստանի Դաշնության ռազմավարական նպատակները Բելառուսում»։ Փաստաթղթով նախատեսվում է մինչև 2030 թվականը Բելառուսի Հանրապետության աստիճանական ամբողջական միացումը Ռուսաստանի Դաշնությանը։ Հետաքննությանը մասնակցել են Süddeutsche Zeitung-ը, WDR-ը, NDR-ը, Yahoo News-ը, Delfi Eesti-ն, Expressen-ը և Independent-ը, VSquare և Frontstory նախագծերը, «Դոսյե» կենտրոնն ու Բելառուսի քննչական կենտրոնը, փոխանցում է DW-ի ռուսական ծառայությունը։

17 էջանոց փաստաթուղթը, որը թվագրված է 2021 թվականով, թվարկում է Բելառուսում Կրեմլի քաղաքական, ռազմական, տնտեսական և սոցիալական նպատակները։ Դրանք բաժանված են երեք կատեգորիաների՝ կարճաժամկետ (մինչև 2022 թվականը), միջնաժամկետ (մինչև 2025 թվականը) և երկարաժամկետ (մինչև 2030 թվականը):

Ռազմավարությունը նախատեսում է «Ռուսաստանի Դաշնության գերակշռող ազդեցության ապահովում սոցիալական քաղաքականության, առևտրի, տնտեսության, գիտության, կրթության և մշակույթի բնագավառներում»։ Դրան նախատեսվում է հասնել, մասնավորապես, Բելառուսի Հանրապետության քաղաքացիների կողմից ռուսական անձնագրեր ստանալու ընթացակարգի պարզեցմամբ. «ինտեգրացիայով հետաքրքրված ռուսաստանցիների շերտ և ռուսական շուկայի վրա կենտրոնացած գործարար շրջանակներ ստեղծելու համար»։

«Հեղինակները կրթությունը տեսնում են որպես ևս մեկ գործիք. մինչև 2030 թվականը նախատեսվում է կենտրոններ բացել Բելառուսում ռուսական դպրոցի ավարտական միասնական պետական քննությունները հանձնելու համար։

Փաստաթղթում նաև ասվում է, որ Բելառուսի Սահմանադրության բարեփոխումը, որը «հաստատվել է» 2022 թվականի փետրվարին «համաժողովրդական հանրաքվեով», պետք է բխի Ռուսաստանի շահերից, և Բելառուսի Հանրապետության օրենքները պետք է «ներդաշնակեցվեն» ՌԴ օրենքներին։

Բացի նպատակներից՝ փաստաթուղթը պարունակում է նաև սպառնալիքներ, որոնք, ըստ Կրեմլի, կարող են խաթարել Ռուսաստանի ծրագրերը Բելառուսում։ Ռազմավարության հեղինակները թվարկում են Լուկաշենկոյի՝ ՆԱՏՕ-ի հետ մերձեցման հնարավորությունը, նրա վրա «ազգայնական և արևմտամետ քաղաքական գործիչների» ազդեցությունը և այլն։

Տաթև Ֆռանգյան