ՌԴ-ին մտահոգում է ԵՄ-ի աճող դերը․ ՀՀ-ի մարտահրավերները չլուծվեցին՝ լավ օրից չէ, որ ԵՄ-ին դիմեցինք․ Արման Եղոյան․ ՏԵՍԱՆՅՈՒԹ

Factor TV–ի հարցազրույցը ԱԺ «Քաղաքացիական պայմանագիր» խմբակցության պատգամավոր Արման Եղոյանի հետ

-Վարչապետն այսօր ներկայացրեց, որ նախօրեին ավարտվել են ՀՀ Կառավարության կողմից Ադրբեջանի հետ խաղաղության հաստատման պայմանագրի նախագծի մշակումների աշխատանքները։ Հայկական կողմի առաջարկները փոխանցվել են ադրբեջանական կողմին: Փաստաթուղթը փոխանցել են նաև ԵԱՀԿ ՄԽ համանախագահող երկրներին: Ի՞նչ է ենթադրում այս նախագիծը։

-Չեմ կարող բովանդակային շատ մանրամասներ ասել, բայց կարող եմ հայտնել, որ արդեն դիտարկումների մի քանի փուլ է տեղի ունեցել, որոշ հարցերում հնարավոր է եղել գալ համաձայնության, որոշներում՝ ոչ։ Չեմ կարծում, թե մեր ուղարկած այս տարբերակի շուրջ հենց հիմա հնարավոր կլինի գալ համաձայնության։

-Ինչո՞ւ եք այդպես կարծում։

-Նախորդ երկու-երեք փուլերի գրագրությունից արդեն գիտենք, թե կողմերը որ հարցի վերաբերյալ ինչ դիրքորոշում ունեն, և թե որ դիրքորոշումն ինչ աստիճանի է փոփոխման ենթակա։

-Գլխավոր տարաձայնությունը ո՞ր հարցի շուրջ է։

-Չեմ կարող ասել, դա արդեն կլինի բովանդակության բացահայտում։

-Հրապարակային հայտարարություններից ելնելով՝ կարող ենք ասել, որ հնարավոր է խոսք լինի ԼՂ հարցով Ստեփանակերտ-Բաքու երկխոսության առումով՝ անվտանգության միջազգային երաշխիքների վերաբերյալ։

-Այո՛, նաև դա։ Այո, միջազգային երաշխիքների հարցն է։ Հասկանում ենք, որ նույնիսկ միջազգային երաշխիքներով կնքված պայմանագրերը նորմալ կերպով չեն իրականացվել։

-Օրինակ՝ նոյեմբեի 9-ի հայտարարությունը։

-Ընդհանրապես, հայտնի են այնպիսի պայմանագրեր, որ չեն կատարվել աշխարհաքաղաքական փոփոխությունների բերումով։ Իսկ նոյեմբերի 9-ի համաձայնությունը եռակողմ է, միջազգային երաշխիքներով պայմանագիր չէ։

-Երաշխավորի ինստիտուտը հայկական կողմի նախաձեռնությունն է, որին չի համաձայնում Ադրբեջանը։

-Այո՛։

-Չեն համաձայնվում նաև միջազգային մեխանիզմներով խոսակցությա՞նը։

-Նկատի ունեք Բաքու-Ստեփանակերտ երկխոսությունը․․․ Այո՛։

-Եթե տարաձայնություններն անլուծելի են, նշանակում է, որ գնում ենք ոչ թե խաղաղության, այլ նորից պատերազմի՞։

-Պետք չէ այդպես բացարձակացնել, և դրա հակառակ պնդումն էլ ճիշտ չէ, որ եթե կնքենք որևէ պայմանագիր, ուրեմն դա կերաշխավորի խաղաղությունը։ Շատերն են ենթադրություններ կառուցում այն մտայնության վրա, որ եթե խաղաղության պայմանագիր կնքվի, դա նույնն է, թե խաղաղություն կհաստատվի, իսկ եթե չկնքվի, պատերազմի վտանգը կմեծանա։ Կարող է և կնքես խաղաղության պայմանագիր ու էլի չհասնես բուն խաղաղությանը, եթե պայմանագրում գրված կետերը չեն արտահայտում կողմերի իրական կամքն ու մտադրությունները։ Խաղաղությունն ավելի շատ կախված է կա՛մ կողմերի կամքից, կա՛մ միջազգային երաշխիքներից, այս երկուսից մեկնումեկը գոնե պետք է լինի, որպեսզի գետնի վրա իրական խաղաղություն լինի, թե չէ՝ թղթի վրա ամեն ինչ էլ կարող ես գեղեցիկ գրել ու ստորագրել։ Անգամ երաշխավորների պարագայում միշտ չէ, որ ստացվել է ապահովել թղթի վրա գրվածի իրագործումը։ Սա չի նշանակում, թե մեզ պետք չէ պայմանագիր, բայց պետք է լինի այնպիսի պայմանագիր, որը կգործի։

Հարցազրույցն ամբողջությամբ՝ տեսանյութում։

Ռոբերտ Անանյան