16.01.2026 | 14:30
Հարավային Կորեայի նախկին նախագահը 5 տարվա ազատազրկման է դատապարտվել
Թուրքիայում փլատակներից փրկել են 10 օրական երեխային, իսկ Սիրիայում հազարավոր մարդիկ ցանկանում են որդեգրել հրաշքով ողջ մնացած նորածնին
Քաղաքականություն
11.02.2023 | 19:18
Թուրքիայից և Սիրիայից շարունակում են հաղորդագրություններ ստացվել երկրաշարժից ժամեր անց հրաշքով ողջ մնացած և փրկված մարդկանց մասին: Սակայն, փրկարարների խոսքով, դրանք եզակի դեպքեր են, և նման նոր հրաշքների հույս գրեթե չի մնում:
Ինչպես փոխանցում է BBC-ի ռուսական ծառայությունը, Թուրքիայի Հաթայ նահանգում փլատակներում 128 ժամ անցկացնելուց հետո դուրս են բերել 13-ամյա տղայի։
Ավելի վաղ փրկարարներին հաջողվել էր փլատակներից հանել մորը և նրա 10-օրյա որդուն, որոնք փլատակներում 90 ժամ են անցկացրել: Տեղական լրատվամիջոցները հրապարակել են ջերմապաշտպանիչ պլաստիկ ծածկոցով փաթաթված փոքրիկի լուսանկարները, որին տեղափոխում են շտապօգնության մեքենա:
Սիրիայում հազարավոր մարդիկ առաջարկել են որդեգրել նորածին աղջկան, որը դուրս է բերվել երկրի հյուսիս-արևմուտքում գտնվող տան փլատակներից: Այան, որը արաբերեն նշանակում է «հրաշք», դեռ պորտալարով կապված էր մոր հետ, որը աղջկա մյուս հարազատների հետ մահացել է երկրաշարժի ժամանակ:
Երկրի նախագահ Ռեջեփ Թայիփ Էրդողանի խոսքով՝ երկուշաբթի օրը Թուրքիայում տեղի ունեցած աղետալի երկրաշարժի հետևանքով զոհվածների թիվը հասել է 21 043-ի:
AFP գործակալության տվյալներով՝ Սիրիայում զոհվել է 3 553 մարդ։
ՄԱԿ-ի փորձագետներն ասում են, որ զոհերի և ավերածությունների ամբողջական պատկերը դեռ չկա, բայց արդեն հիմա կարելի է փաստել, որ երկրաշարժի հետևանքները սարսափելի են:
Տասնյակ հազարավոր մարդիկ, ովքեր զրկվել են կացարանից, ստիպված են պատսպարվել առևտրի կենտրոններում, մզկիթներում և մարզադաշտերում: Շանլըուրֆա քաղաքում շուրջ մեկուկես հազար մարդ արդեն մի քանի գիշեր անցկացնում է վրաններում:
Տարբեր միջազգային կազմակերպություններ նախազգուշացնում են, որ եթե անհապաղ միջոցներ չձեռնարկվեն, ստեղծված իրավիճակը սպառնում է վերաճել լիարժեք հումանիտար ճգնաժամի:
Հիշեցնենք՝ հայ փրկարարները Թուրքիայում փլատակներից ողջ դուրս են բերել 8-ամյա աղջկա։
