Կիմ Չեն Ինը կոչ է արել աննախադեպ տեմպով ուժեղացնել Հյուսիսային Կորեայի ռազմական հզորությունը

ԿԺԴՀ առաջնորդ Կիմ Չեն Ընը Կորեայի ժողովրդական բանակի հիմնադրման 75-ամյակի կապակցությամբ անցկացված լայնածավալ շքերթի մասնակիցների հետ զրույցում հայտարարել է ինտենսիվ և արագացված տեմպերով երկրի ռազմական հզորության ամրապնդման անհրաժեշտության մասին։ Այս մասին հայտնում է Կորեայի կենտրոնական լրատվական գործակալությունը (KCNA), փոխանցում է Ինտերֆաքսը:

Միջոցառման ժամանակ Կիմ Չեն Ընն ասել է, որ «ավելի ու ավելի դաժան իմպերիալիստական բռնակալությունը բռնի ուժով ճնշելու համար» պահանջում է, որ բանակն «ուժեղանա անհամեմատ ավելի արագ տեմպերով, քան անցյալում էր»:

Ըստ աղբյուրի՝ նա ընդգծել է, որ Հյուսիսի բարգավաճումը կախված է «ուժեղ բանակից» և նշել, որ «մարդը կարող է պատիվ դրսևորել միայն այն ժամանակ, երբ ուժեղ է»։

Կիմ Չեն Ընը նաև ասել է, որ այս շքերթն «ավելի հստակ ցույց տվեց մեր պետության հեղինակությունն ու մեծությունը, բարձր պատիվն ու պայծառ ապագան»։

Ավելի վաղ հարավկորեական Yonhap լրատվական գործակալությունը, վկայակոչելով իրազեկ աղբյուրին, նշել էր, որ Հյուսիսային Կորեան չորեքշաբթի Փհենյանում ռազմական շքերթ է անցկացրել։

Հյուսիսը շքերթի ընթացքում ցուցադրել է մի շարք նոր բալիստիկ հրթիռներ, այդ թվում՝ Hwaseong-17 միջմայրցամաքային բալիստիկ հրթիռը շարժական արձակման սարքի վրա։ Այս մասին են վկայում արբանյակային պատկերները, որոնք ստացվել են ամերիկյան Maxar Technologies տիեզերական տեխնոլոգիական ընկերության կողմից: Սպասվում է, որ ավելի ուշ Հյուսիսային Կորեան զորահանդեսի տեսագրություններ կցուցադրի։

Նշենք, որ Կիմ Չեն Ընի իշխանության գալուց ի վեր Հյուսիսային Կորեայում 13 ռազմական շքերթ է անցկացվել։ Նախորդն անցկացվել է 2022 թվականի ապրիլին։

Տաթև Ֆռանգյան