Ռուսները հասկանում են՝ ԵՄ-ն եկել է իրենց փոխարինելու, սա շատ վտանգավոր է. Արմեն Ռուստամյան․ ՏԵՍԱՆՅՈՒԹ

«Ռուսները հասկանում են, որ ԵՄ-ն մուտքը այս տարածաշրջան, նշանակում է, որ եկել են իրենց փոխարինելու, սա շատ վտանգավոր է»,- այս մասին այսօր լրագրողների հետ ճեպազրույցում նշեց ԱԺ «Հայաստան» դաշինքի պատգամավոր Արմեն Ռուստամյանը։

Պատգամավորի խոսքով՝ եթե ԵՄ դիտորդները գալիս են Հայաստան՝ տեսնելու, թե ռուսներն այստեղ ինչ են անում, ռուսներն արդյոք սպառնալիք են այս տարածաշրջանում, դա նշանակում է, որ այն հակամարտությունը, որ գոյություն ունի Ռուսաստանի և Արևմուտքի միջև՝ կապված ուկրաինական պատեազմի հետ, տեղափոխել մեր տարածք։
Ընդդիմադիր պարգամավորի դիտարկմամբ՝ մինչև ՀԱՊԿ-ին ինչ-որ բանում մեղադրելը կամ Հայաստանում ՀԱՊԿ խաղաղապահներ տեղակայելուց հրաժարվելը, պետք էր հասկանալ՝ այլընտրանքը ո՞րն է։

«Եթե ՀԱՊԿ-ում հրաժարվել են ասել, թե որն է Հայաստանի տարածքը և ասել, որ ՀԱՊԿ-ը այստեղ անելիք չունի, ուրեմն՝ այդ անվտանգության համակարգից պետք է հրաժարվենք, ես էլ հարց եմ տալիս՝ նորը ստեղծե՞լ եք, որ դրանից հրաժարվում եք։ Չենք հասկանում այս ամենի կործանարար ընթացքը, սա նոր պատերազմի շեմ է մեզ համար»,- նշեց Ռուստամյանը։

Պատգամավորի դիտարկմամբ՝ Լավրովն այդ մասին շատ պարզ է ասել, որ ՀԱՊԿ-ը Հայաստանի տարածքների վերաբերյալ դիրքորոշում չի ունեցել, քանի որ անդամ երկրներից ոչ բոլորն են համաձայնություն հայտնել, իսկ խաղաղապահներ ուղարկելու հարցում միայն Հայաստանն է դեմ արտահայտվել։

«Լավ, այն մեկով կոնսենսուս չի եղել, այս մեկով կոնսենսուս եղել է, Հայաստանն ինչո՞ւ չի համաձայնել։ Այս հարցում էլ Հայաստանն է կոնսենսուսը խախտել։ Հայաստանն ասել է՝ չէ, քանի իմ ասածը չեք արել, ես դրան դեմ եմ, սա ի՞նչ մոտեցում է, թող սրա մասին պատասխանեն մեր դիվանագետները և բավական է ժողովրդին մոլորեցնել։ Հիմա որ սա այս մասին խոսում ենք, ասում են՝ ո՞ւմ ջրաղացին եք ջուր լցնում, ինչ է՝ իրականությունը չասենք, որ հանկարծ ուրիշի ջրաղացին ջուր չգնա՞»,- հավելեց Ռուստամյանը։

Մանրամասները՝ տեսանյութում։