Անգելա Մերկելը ՅՈՒՆԵՍԿՕ-ի Խաղաղության մրցանակ է ստացել

Գերմանիայի նախկին կանցլեր Անգելա Մերկելն արժանացել է Ֆելիքս Ուֆուե-Բուանիի խաղաղության մրցանակին, որը սահմանվել է ՄԱԿ-ի Կրթության, գիտության և մշակույթի կազմակերպության (ՅՈՒՆԵՍԿՕ) կողմից։ Մրցանակաբաշխությունը տեղի է ունեցել փետրվարի 8-ին Կոտ դ’Իվուարի մայրաքաղաք Յամուսուկրոյում։ Մրցանակը կրում է աֆրիկյան այս երկրի առաջին նախագահի անունը։ Այս միջոցառումը համընկել է Félix Houphouet-Boigny Peace Research Foundation-ի 50-ամյակի հետ, որին հրավիրված են եղել նաև աֆրիկյան պետությունների ղեկավարները, գրում է DW-ի ռուսական ծառայությունը։

Կոտ դ՛Իվուարի մայրաքաղաք Մերկելի ժամանման մասին հիշեցնում է նրա պատկերով հսկայական պաստառներ։ Յամուսուկրոյի փողոցներում մարդիկ հիանում են Անգելա Մերկելով։

«Թերթում կարդացի, որ նա կստանա Ֆելիքս Ուֆուե-Բուանիի խաղաղության մրցանակը։ Նա արժանի է դրան, քանի որ զարմանալի կին է։ Նա շատ բան է արել աշխարհի համար»,- ասել է տեղի բնակիչներից մեկը DW-ին տված հարցազրույցում։

«Նա իսկական առաջնորդ էր, շատ բանի հասավ: Նա օգնեց ներգաղթյալներին Եվրոպա բերել և դռներ բացեց հազարավոր փախստականների համար»,- գովաբանել է Մերկելին քաղաքի մեկ այլ բնակիչ:

Գերմանիայի նախկին կանցլերը ՅՈՒՆԵՍԿՕ-ի մրցանակին է արժանացել 2015 թվականին Եվրոպայում Սիրիայից, Իրաքից և Աֆղանստանից փախստականների հսկայական հոսքի պատճառով Եվրոպայում ծագած ճգնաժամի կարգավորման գործում ներդրած ավանդի համար։

Այդ ժամանակ նա քաջություն ունեցավ բացել իր երկիրը հազարավոր փախստականների առաջ: Անգելա Մերկելի՝ 2015 թվականի օգոստոսի 31-ին հնչեցրած արտահայտությունը՝ «Մենք գլուխ կհանենք», և՛ հարգանք, և՛ քննադատություն առաջացրեց այն ժամանակվա կանցլերի նկատմամբ ու մտավ պատմության մեջ։ Մերկելն այդ պահին դրական ազդանշան տվեց միգրացիոն քաղաքականությանը։

Տաթև Ֆռանգյան