MH17-ի կործանումը. քննիչները խոսում են Պուտինի քաղաքական պատասխանատվության մասին

MH17-ի կործանման գործով ամբաստանյալների դատավարության ավարտից ընդամենը 2,5 ամիս անց քննչական խումբը հայտարարել է, որ արել է հնարավորը՝ մյուս կասկածյալներին բացահայտելու համար, բայց այլևս չի կարող որևէ մեկին մեղադրանք առաջադրել։ Միաժամանակ, քննիչները հայտնել են, որ միջադեպի քաղաքական պատասխանատուն ՌԴ նախագահ Վլադիմիր Պուտինն է, գրում է BBC-ի ռուսական ծառայությունը։

Հետազոտելով տասնյակ լուսանկարներ և տեսանյութեր, ինչպես նաև հեռախոսային խոսակցությունների հարյուրավոր գաղտնալսումներ՝ հետաքննությունը պարզել է, որ Boeing MH17 չվերթի ուղղությամբ արձակված «Բուկ» զենիթահրթիռային կայանը Դոնբաս է ժամանել Ռուսաստանից, մասնավորապես՝ ՀՕՊ 53-րդ բրիգադի գտնվելու վայրից։ Ինչպես 2014 թվականին, այնպես էլ հիմա այս բրիգադը ղեկավարում է գնդապետ Սերգեյ Մուչկաևը։ Նա ենթարկվում է Պաշտպանության նախարարության հրամաններին, որը ղեկավարում է Սերգեյ Շոյգուն, որն իր հերթին ենթարկվում է ՌԴ նախագահ Վլադիմիր Պուտինին, հայտնել են քննիչները։

Քննչական խումբը պարզաբանում է, որ Մուչկաևն ի պաշտոնե պետք է իմանար «Բուկ»-ի շարժման մասին, սակայն դա անհնար է ապացուցել։ Որևէ ապացույց չկա, որ նա որևէ մասնակցություն է ունեցել կամ նույնիսկ եղել է սահմանամերձ գոտում։ Հասկանալի պատճառներով նրան հնարավոր չի եղել նաև հարցաքննել։

Ասուլիսի հենց սկզբում համատեղ քննչական խմբի ներկայացուցիչները նախազգուշացրել են, որ սա, հավանաբար, իրենց վերջին նման ելույթն է։ Ըստ քննչական խմբի՝ բոլոր հնարավոր հետքերն ուշադիր ուսումնասիրվել են, քննիչներն արել են հնարավոր ամեն ինչ՝ ճշմարտությունը պարզելու համար, սակայն ստացված արդյունքները բավարար չեն այլ հնարավոր անձանց մեղադրանք առաջադրելու համար։

Հիշեցնենք, որ 2014 թվականի հուլիսի 17-ին Ամստերդամից Կուալա Լումպուր ուղևորվող Boeing 777 մարդատար ինքնաթիռը խոցվել էր Ուկրաինայի օդային տարածքում:

MH17 չվերթն իրականացնող օդանավի կործանման զոհ է դարձել 298 մարդ՝ բոլոր 283 ուղևորները և անձնակազմի 15 անդամները:

Տաթև Ֆռանգյան