Թուրքիայի ընդդիմության առաջնորդը Էրդողանի վարչակազմին մեղադրել է երկրաշարժի փրկարարական աշխատանքն ու օգնությունը ձախողելու մեջ

Թուրքիայի ընդդիմության առաջնորդ Քեմալ Քըլըչդարօղլուն երկրաշարժից տուժած շրջաններ կատարած այցի ժամանակ հայտարարել է, որ կառավարությունը ձախողում է փրկարարական և օգնություն ցուցաբերելու ջանքերը, և որ իրենք են ձեռնարկելու փրկարարական և օգնության աշխատանքներ, գրում է Bianet-ը։

Ժողովրդահանրապետական կուսակցության (CHP) ղեկավարն Ադանա և Հաթայ այցելության ժամանակ հայտարարել է, որ Էրդողանի վարչակարգը չի կարողացել իրականացնել փրկարարական և օգնության համարժեք աշխատանքներ։

Սոցցանցերի իր օգտահաշիվներում տարածած տեսանյութում Քըլըչդարօղլուն հրավիրել է քաղաքացիներին և CHP-ի քաղաքապետերին՝ փրկարարական և օգնության աշխատանքներ ձեռնարկել: Նա երկրաշարժից տուժած շրջանների բնակիչներին հավաստիացրել է, որ Թուրքիայում բոլորն աջակցում են իրենց։

«Ամեն ինչ անելու ենք քաղաքներն ու գյուղերը վերականգնելու համար։ Ես և մեր քաղաքապետերն այստեղ ենք այդ նպատակով: Ուզում եմ դիմել կառավարությանը․ այս անգամ մենք չենք ընդունի այն բյուրոկրատական արգելափակումը, որ դուք արել եք COVID-ի համաճարակի ժամանակ։ Մենք հնարավորինս արագ կտեղափոխենք օգնությունն այնտեղ, որտեղ այն պետք է: Մենք չենք անհանգստանում պալատի քաղաքականությամբ, նրա PR ջանքերով կամ կեղծ լուրերով: Օրինակ, նախարարները շրջագայություն են անում ավտոշարասյան հետ միասին PR-ի համար: Բայց այստեղ անհրաժեշտ միջոցները չեն ձեռնարկվել։ Եվ նրանք չեն կարողացել պատշաճ կերպով օգտվել մեր երկրի նոու-հաուից և փորձից»,- ասել է գործիչը։

«Ես մեր քաղաքապետերին ասել եմ, որ ամեն ինչ անելու են, որ ռեսուրսներ հատկացնեն։ Բյուրոկրատական արգելափակումո՞վ են մեզ սահմանափակում։ Մի ՛լսեք նրանց: Ժողովրդին հաց ու վերմակ պե՞տք է։ Ձերբակալվե՛ք, եթե պետք է»,- հավելել է նա։

Նշենք, որ ընդդիմությունը շարունակում է քննադատել իշխանություններին փրկարարական աշխատանքները ոչ համարժեք կազմակերպելու համար։ Մասնավորապես, նրանք հայտարարում են, որ երկրի մի շարք շրջաններում մարդիկ ինքնուրույն են փլատակներից դուրս բերում տուժածների՝ օգնության բացակայության պայմաններում։

Էմմա Չոբանյան