«Իրավաբանության Արվեստը» փաստաբանական գրասենյակն իրավաբանական դպրոց է հիմնել․ ՏԵՍԱՆՅՈւԹ

Տիգրան Մեծի 65ա շենքի 5-րդ հարկում այսուհետ գործելու է իրավաբանական դպրոց։ Գաղափարն «Իրավաբանության Արվեստը» փաստաբանական գրասենյակի հիմնադիր-տնօրեն Էդգար Հակոբյանինն ու գործընկերներինն է։ Ուսանողներն այս դպրոցում կստանան ոչ միայն տեսական, այլև գործնական գիտելիքներ ու փորձ։ Մինչ իրավաբանական դպրոց հիմնելը փաստաբան-գործընկերները «Հայցադիմում» խորագրով կարճաժամկետ դասընթաց են իրականացրել, որը մեծ և դրական արձագանք է ստացել, սակայն այդ ժամանակ չունեին համապատասխան տարածք ու պայմաններ՝ այն շարունակելու համար։

«Բոլոր այն փաստաբանները, իրավաբանները, որոնք չունեն փորձ, չեն մասնակցել դատավարությունների, չունեն հմտություններ, կարող են դիմել մեր իրավաբանական դպրոց»,- ասում է Էդգար Հակոբյանը։

Նորաբաց դատական նիստերի դահլիճում ուսանողները կկարողանան կիրառել ստացած տեսական գիտելիքները, նաև հնարավորություն կունենան ծանոթանալ «Իրավաբանության Արվեստը» փաստաբանական գրասենյակի ընթացիկ գործերին՝ պահպանելով փաստաբանական գաղտնիք պարունակող տեղեկությունները։

«Մեր դպրոցի ուսանողները կպատկերացնեն՝ դատավարությունն ինչպես է ընթանում, ինչպես պետք է հանդես գան, կսովորեն մի շարք այլ գործնական հմտություններ։ Դասավանդումները լինելու են քրեական, վարչական և քաղաքացիական իրավունքի ոլորտներում, դասավանդելու են տարբեր ոլորտի պրոֆեսիոնալ մասնագետներ»,- ընդգծում է «Իրավաբանության Արվեստը» փաստաբանական գրասենյակի հիմնադիր-տնօրենը։

Դասընթացի ավարտին դատական նիստերի դահլիճում կազմակերպվելու է խաղարկված դատավարություն․ այսպես բուհը նոր ավարտած և փաստաբանական համայնք մուտք գործող երիտասարդները, բացի տեսական գիտելիքներից, կունենան նաև փորձ և ավելի հեշտությամբ աշխատանք կգտնեն։

Փաստաբան Սամսոն Գալստյանն ասում է՝ չեն ուզում ուսանողները բախվեն այն խնդիրներին, որոնց բախվել են իրենք տարիներ առաջ փորձ ու պրակտիկ գիտելիքներ չունենալու պատճառով։ Փաստաբան Գևորգ Մխիթարյանն էլ հիշում է՝ ուսանողական տարիներին կարդացել էր, գիտեր՝ ինչ է դատավարությունը, բայց պատկերացնում չուներ՝ ինչպես է իրականացվում, իսկ այս իրավաբանական դպրոցից ակնկալիքները շատ մեծ են։

Դպրոցի բացման հանդիսավոր արարողությանը ներկա էին Փաստաբանների պալատի անդամներ, դատավորներ, փաստաբաններ։  Փաստաբանների պալատի նախագահի տեղակալ Հարութ Ակլունցն էլ խոստացավ ցանկացած հարցով աջակցել գաղափարի հեղինակներին։

«Այս գեղեցիկ և հարմարավետ գրասենյակը ձեր տարիների աշխատանքի առհավատչյան է։ Ցանկանում եմ, որ առավել մեծ հաջողություններ գրանցեք»,- իր ելույթում ընգծեց Ակլունցը։

Իրավաբական դպրոցի ընդունելության հայտարարությունը կտեղադրվի «Իրավաբանության Արվեստը» փաստաբանական գրասենյակի ֆեյսբուքյան էջում։ Վարձավճարը կախված կլինի դասընթացի տեսակից և տևողությունից։ Մշակվելու է գնային ճկուն համակարգ, որը հարմար կլինի բոլորին՝ վստահեցնում է «Իրավաբանության Արվեստը» փաստաբանական գրասենյակի հիմնադիր-տնօրեն Էդգար Հակոբյանը։

Դատական նիստերի դահլիճը կարճաժամկետ կտրամադրվի նաւ միջոցառումներ կամ դատախաղեր կազմակերպելու նպատակով։

Փաստաբան-գործընկերները նախատեսում են հիմնադրել նաև իրավաբանական կլինիկա․ դասընթացները կլինեն անվճար, իսկ սահմանված օրերին կլինիկայի ուսանողները հնարավորություն կունենան անվճար իրավաբանական խորհրդատվություն տրամադրել նրանց, ովքեր հնարավորություն չունեն փաստաբանի վճարովի ծառայություններից օգտվելու։ Խորհրդատվություն կլինի նաև մարզերում։

Դատական նիստերի դահլիճում նախատեսվում է հիմնադրել նաև Art of LAW անվանումով արբիտրաժային դատարան։

Մանրամասները՝ տեսանյութում։

Արփի Հակոբյան