09.10.2026 | 13:48
Վարչապետի խոսնակը՝ Փաշինյանի՝ ադրբեջաներեն երգի ուղեկցությամբ հրապարակված տեսանյութի մասին
Հայտնաբերվել է առանձնապես խոշոր չափերի թմրամիջոց․ 27-ամյա երիտասարդին մեղադրանք է ներկայացվել․ ԼՈՒՍԱՆԿԱՐՆԵՐ
Հասարակություն
04.02.2023 | 19:51
ՀՀ քննչական կոմիտեից տեղեկացնում են, որ հայտնաբերվել է առանձնապես խոշոր չափերի թմրամիջոց։ 27-ամյա երիտասարդին մեղադրանք է ներկայացվել։
«ՀՀ քննչական կոմիտեի ԵՔՔՎ Ավան և Նոր Նորք վարչական շրջանների քննչական բաժնում ՀՀ քրեական օրենսգրքի 393-րդ հոդվածի 2-րդ մասի 2-րդ և 3-րդ կետերով նախաձեռնված քրեական վարույթի շրջանակներում շարունակվող վարութային, ապացուցողական, ինչպես նաև օպերատիվ-հետախուզական գործողությունների արդյունքում պարզվել են թմրամիջոցի ապօրինի շրջանառության դեպքի նոր հանգամանքներ։
Ինչպես ՀՀ քննչական կոմիտեն տեղեկացրել էր, 2023թ․ փետրվարի 2-ին թմրամիջոցի ապօրինի շրջանառության վերաբերյալ օպերատիվ տվյալների իրացման արդյունքում Երևան քաղաքի Նոր Նորք վարչական շրջանի Մոլդովական փողոցից, ապօրինի թմրամիջոցներ ձեռք բերելու, պահելու և իրացնելու անմիջականորեն ծագած հիմնավոր կասկածով, ձերբակալվել և ոստիկանության Նոր Նորքի բաժին էր տեղափոխել Երևան քաղաքի՝ 1996թ. ծնված բնակիչ: Վերջինիս անձնական խուզարկությամբ հայտնաբերվել էր ընդհանուր մոտ 26.9 գրամ քաշով, նախնական տվյալներով, «Մարիխուանա» տեսակի թմրամիջոցի նմանվող դեղնականաչավուն զանգվածի 30 հատ փաթեթ:
Պարզվել էր, որ նա Երևան քաղաքի Նոր Նորք վարչական շրջանի տարբեր հատվածներում արդեն իսկ տեղադրել էր «Մարիխուանա» տեսակի թմրամիջոցի՝ թվով 5 հատ փաթեթ, որոնք պետք է իրացվեին «Տելեգրամ» հավելվածում գրանցված էջի միջոցով։
Հսկող դատախազի կողմից հարուցված քրեական հետապնդման հիման վրա վարույթն իրականացնող քննիչի կողմից 27-ամյա երիտասարդին մեղադրանք է ներկայացվել ՀՀ քրեական օրենսգրքի 46-393-րդ հոդվածի 2-րդ մասի 2-րդ և 3-րդ կետերով։ Վերջինս մեղադրվում է դեռևս ինքնությունը չպարզված՝ «Տելեգրամ» հավելվածի համապատասխան ալիքի օգտատիրոջ կողմից ապօրինի թմրամիջոց իրացնելուն օժանդակելու, մասնավորապես՝ նրա կողմից իրացման մատակարարումը կազմակերպելու և դրանից շահույթ ստանալու նպատակով խոշոր չափերի թմրամիջոց ապօրինի ձեռք բերելու, պահելու և իրացնելու համար։
Շարունակվող նախաքննության ընթացքում դատարանի որոշման հիման վրա 27-ամյա երիտասարդի բնակարանում կատարվել է խուզարկություն, որի արդյունքում վարույթն իրականացնող քննիչի և ՀՀ ՆԳՆ ոստիկանության քրեական ոստիկանության աշխատակիցների կողմից հայտնաբերվել և վերցվել է առանձնապես խոշոր չափերի՝ ևս շուրջ 170 հատ փաթեթներով ընդհանուր մոտ 345 գրամ թմրամիջոցի նմանվող զանգված, որն ուղարկվել է փորձաքննության։
Վարույթն իրականացնող քննիչի կողմից միջնորդություն է ներկայացվել դատարան՝ նշված անձի նկատմամբ կալանքը որպես խափանման միջոց ընտրելու վերաբերյալ։
Ձեռնարկվում են միջոցառումներ հայտնաբերված թմրամիջոցի ձեռք բերման աղբյուրը, ինչպես նաև՝ ապօրինի շրջանառության մասնակից հնարավոր այլ անձանց պարզելու ուղղությամբ»,- ասված է ՔԿ-ի տարածած հաղորդագրության մեջ:
