Պատրոն Դավո մականվամբ հայտնի Դավիթ Գալստյանը կալանավորվել է

Պաշտպանության նախարարությանը զենք մատակարարող ընկերության տնօրեն Դավիթ Գալստյանը կալանավորվել է։ Այս տեղեկությունը Factor.am-ի հետ զրույցում հաստատեց Գալստյանի պաշտպաններից Արմեն Հարությունյանը։ Երևանի ընդհանուր իրավասության քրեական դատարանը՝ նախագահությամբ դատավոր Ժորա Չիչոյանի, Գալստյանին կալանավորելու վերաբերյալ միջնորդությունը քննել և որոշում կայացնելու համար առանձին սենյակ (խորհրդակցական սենյակ) էր հեռացել երեկ՝ հունվարի 31-ին։ Պաշտպանական կողմը Գալստյանի մեղադրանքի վերաբերյալ որևէ տեղեկություն չի հայտնում։

Նշենք, որ Գալստյանն այս պահին մեղադրյալ է պաշտպանության նախկին նախարար Դավիթ Տոնոյանի գործով, որը ստացել է «անպիտան հրթիռների գործ» անունը և վերաբերում է զինված ուժերի կարիքների համար ռազմամթերքի մատակարարման գործընթացում ենթադրյալ չարաշահումներ և առանձնապես խոշոր չափերով հափշտակություններ կատարելու ենթադրյալ դեպքերին։

Այս գործի շրջանակներում Գալստյանը գտնվել է կալանքի տակ, ապա 50 մլն դրամ գրավի դիմաց ազատ է արձակվել։  ԱԱԾ-ում քննվում է Գալստյանի վերաբերյալ, ՊՆ-ից ենթադրյալ չարաշահումներին առնվող ևս մեկ գործ, որի շրջանակներում Գալստյանը կալանավորվել, ապա՝  գրավով ազատ է արձակվել։ Ազգային անվտանգության ծառայությունը 2021 թվականի փետրվարի 1-ին այս գործով հաղորդագրություն էր տարածել՝ հայտնելով, որ  արտերկրում գրանցված ընկերության խորհրդի նախագահ Դ. Գ.-ն, նախնական համաձայնության գալով նույն ընկերության տնօրեն Ա. Բ.-ի հետ, ի սկզբանե առանձնապես խոշոր չափերի գումար հափշտակելու դիտավորությամբ,  ընկերության անունից Պաշտպանության նախարարության հետ կնքել է պայմանագիր, որի համաձայն՝ ընկերությունը պարտավորություն է ստանձնել 2018 թվականի ընթացքում, ԶՈՒ ԳՇ կարիքների համար մատակարարել 1983-1986 թթ. արտադրության հրանոթի համապատասխան տրամաչափի կրակոցներ, սակայն պայմանագրով նախատեսված հրանոթի համապատասխան տրամաչափի կրակոցների փոխարեն, խաբեության եղանակով՝ թաքցնելով մատակարարված գույքի տակտիկատեխնիկական բնութագրին չհամապատասխանելու փաստը, մեկ միասնական դիտավորությամբ, ՊՆ-ին են մատակարարել ընդհանուր՝ 523.089.000 ՀՀ դրամին համարժեք, 1.083.000 ԱՄՆ դոլար արժեքով ավելի հին՝ 1977 թվականի Չեխական արտադրության մեկ այլ տեսակի հրանոթի կրակոցներ, որոնք իրենց մարտավարական և տեխնիկական հատկանիշներով, ըստ ԱԱԾ-ի տարածած հաղորդագրության,  էապես զիջել են այն հրանոթի կրակոցներին, որոնց համար դրանք մատակարարվել են։ Այս գործով Դավիթ Գալստյանին և Արմեն Բաղդասարյանին մեղադրանք էր առաջադրվել և նրանց կալանավորելու միջնորդություն ներկայացվել դատարան։

Նշենք, որ Ազգային ժողովի առաջիկա հերթակա նիստին՝ փետրվարի 7-ին քննարկվելու է Պաշտպանության նախկին նախարար Սեյրան Օհանյանին անձեռնմխելիությունից զրկելու հարցը։ Ըստ այս գործի՝ ՀՀ պաշտպանության նախկին նախարարը, օգտագործելով պաշտոնեական դիրքը կատարել է առանձնապես խոշոր չափերով վատնում (երկու դրվագ), ինչպես նաեւ՝ անձնական այլ շահագրգռվածությունից և խմբային շահերից ելնելով, իր պաշտոնեական դիրքն օգտագործել է ծառայության շահերին հակառակ, որն անզգուշությամբ առաջացրել է ծանր հետեւանքներ (երկու դրվագ)։ Չի բացառվում, որ Դավիթ Գալստյանի մեղադրանքը կապված լինի այս գործի հետ։

Արաքս Մամուլյան