Թուրքիայի կառավարամետ հեռուստաընկերությունն աշխատանքից ազատել է լրագրողին՝ երկրում աղքատության մասին ռեպորտաժի պատճառով

Թուրքիայի կառավարամետ Habertürk հեռուստաընկերությունն աշխատանքից ազատել է լրագրողին, որը վերջերս պատմել է երիտասարդ տղայի մասին, որն ասել է, թե մայրն իրեն «որպես նվեր միս է գնել» լավ գնահատականների համար։ Այս մասին հայտնում են տեղական լրատվականները, որոնց վկայակոչում է Turkish Minute-ը։

Անցյալ շաբաթվա լուրերի մեջ, որի տեսանյութը լայն տարածում է գտել սոցիալական ցանցերում, տղան լրագրող Ֆաթմանուր Բոյլուին ասում է, որ մայրն իր համար միս է գնել՝ կիսամյակային բարձր գնահատականները նշելու։ Տեսանյութում երևում է նաև, որ մսագործը գառան երեք կոտլետ է տալիս տղային:

Տեսանյութը հակասական մեկնաբանությունների տեղիք է տվել սոցիալական ցանցերում։ Որոշ օգտատերեր նշում են այն տնտեսական դժվարությունները, որոնց պատճառով շատ ընտանիքներ են տառապում Թուրքիայում, որտեղ կյանքի ապշեցուցիչ բարձր գինը դարձել է սովորական երևույթ։ Որոշներն էլ ասում են, որ նման լուրերը կառավարման գործողության արդյունք են:

Habertürk հեռուստաընկերությունը հայտնել է, որ աշխատանքից ազատել է Բոյլուին այն բանի համար, որ նա «թելադրող և ուղղորդող նախնական ելույթ» է ունեցել լուրերում խոսող երեխայի հետ, ինչը, ըստ նրանց, «ամբողջովին հակասում է մասնագիտական էթիկային»: Հեռուստաընկերությունը հավելել է, որ հետաքննություն են անցկացրել, ուսումնասիրել են լուրերի չմշակված կադրերը և վերցրել թղթակցի հայտարարությունը տվյալ հարցի վերաբերյալ։

Տղայի մայրը, որը խոսել է լրատվամիջոցի հետ տեսանյութի տարածումից հետո, հայտարարել է, որ իրենք աղքատ ընտանիք չեն, ունեն իրենց տունն ու մեքենան:

Թուրքական լրատվամիջոցները, վկայակոչելով Կարմիր մսի ազգային խորհրդի (UKON) տվյալները, հայտնում են, որ կարմիր մսի մեկ կիլոգրամի գինը 2022 թվականի դեկտեմբերի 15-ի 116,9 լիրայից (6,2 դոլար) աճել է՝ հունվարի 16-ին հասնելով 135,5 լիրայի (7,2 դոլար):

Հավելենք, որ Թուրքիայում գնաճը հասել է վերջին երկու տասնամյակի ամենաբարձր մակարդակին։ Ըստ պաշտոնական վիճակագրության՝ 2022 թվականի վերջին գնաճը հասել եր 85 տոկոսի։

Էմմա Չոբանյան